Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 455 Hüküm no: 518 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ahmed’in talebiyle bakmakta olduğu torunu Zeyneb’in ihtiyaçları için babası Bayram b. Ahmed’in ödemesi şartıyla nafaka takdir edildiği Mahmiye-i İstanbul’da Silivrikapısı kurbünde İbrahim Paşa Mahallesiʼnde sâkine olup zâtı ta‘rîf-i şer‘î ile mu‘arrefe olan Âişe bt. Ahmed nâm hatun meclis-i şer‘-i şerîf-i enverde takrîr-i kelâm edip işbu kızım Havvâ bt. Mahmud’un zevc-i mutallıkı olan Bayram b. Ahmed’in firâşından hâsıla ve kızım mezbûre Havvâ’dan mütevellide olup bi-hakkı’l-hıdâne hacr u terbiyemde olan Zeyneb nâm sagīrenin nafaka ve kisveye zarûret ve ihtiyâcı olmağla cânib-i şer‘den babası mezbûr Bayram üzerine kadr-i ma‘rûf nafaka ve kisve-bahâ farz ve takdîr olunmak murâdımdır dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri sagīre-i mezbûr[e]nin nafaka ve kisve ve sâir mesârif-i lâzımeleri için babası mezbûr Bayram üzerine beher yevm beşer akçe farz ve takdîr edip meblağ-ı mefrûz-ı mezkûru sagīre-i mezbûre Zeyneb’in nafaka ve kisve ve sâir mesârif-i lâzımesine harc u sarfa ve hîn-i zarûretde istidâneye ve lede’z-zafer babası mezbûr Bayram üzerine rücû‘a merkūme Âişe’ye izin vermeğin mâ-hüve’l-vâki‘ bi’t-taleb ketb [olundu.] Fi’l-yevmi’s-sâlis ve’l-işrîn min-Recebi’l-ferd sene 1121 Şuhûdü’l-hâl: Mehmed Çelebi b. Abdullah Kethüdâ-yı muhzırân, Mustafa Çelebi b. Şa‘ban an-Galata, Osman b. Mustafa el-Muhzır, Mehmed Çelebi b. Abdullah, Hasan b. Abdullah, Abdullah b. Abdurrahman, Ali Beşe b. Bâli, Ali Çelebi b. İvaz, Hasan Çelebi b. Abdulkādir, Süleyman b. Abdullah, Mehmed Çelebi b. Abdurrahman ve gayruhum mine’l-huzzâr.