Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 455 Hüküm no: 519 Orijinal metin no: [71b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Osman Efendi b. Hacı Musa’nın vefât eden Hadice Hatun bt. Şişeci Mehmed Efendi’nin vasiyeti gereği hacca gitmek için vasisi olan damadı İbrahim Ağa b. Halil’den hac parasını aldığı Mahmiye-i İstanbul’da Harâccı Muhyiddin Mahallesi sükkânından el-Hâc Osman Efendi b. el-Hâc Musa nâm kimesne meclis-i şer‘-i şerîf-i enverde mahmiye-i mezbûrede Sükûtî Mahallesiʼnde sâkine iken bundan akdem vefât eden Hadice Hatun bt. Şişeci Mehmed Efendi’nin dâmadı ve vasiyy-i muhtârı olan İbrahim Ağa b. Halil nâm kimesne mahzarında ikrâr-ı tâm ve takrîr-i kelâm edip müteveffât-ı mezbûre Havvâ [Hatice] Hatun hâl-i hayâtında hacc-ı şerîf etmek için sülüs-i mâlından iki yüz elli guruş bedel-i hac vasiyet edip ve sülüs-i mâlı dahi müsâ‘id olmamağla hâlâ vasiyy-i merkūm İbrahim Ağa ber-mûceb-i vasiyet müteveffât-ı mezbûre Hadice Hatun’un sülüs-i mâlından meblağ-ı mezbûr iki yüz elli guruşu bedel-i hac olmak üzere tamamen bana def‘ ü teslîm ben dahi ber-vech-i muharrer yedinden ahz u kabz edip ve işbu sene-i mübârekede müteveffât-ı mezbûre için hacc-ı şerîf etmek üzere âzim ve müte‘ahhid oldum dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 min-Recebi’l-ferd sene 1121 Şuhûdü’l-hâl: Umdetü’l-mevâli’l-izâm Atâullah Efendi eş-şehîr bi-Cevvîzâde, Fahrü’l-müderrisîni’l-kirâm Hüseyin Efendi b. el-Hâc Mustafa, Abdurrahman Efendi b. el-Hâc Mustafa, Yusuf Çelebi b. Abdullah, el-Hâc İbrahim b. Abdurrahman el-Attâr, Mehmed b. Hüseyin, el-Hâc Mustafa b. Abdurrahman el-Attâr, Osman Çelebi b. Mehmed, Hüseyin Efendi b. Abdullah, Mehmed Ağa b. Abdullah Kethüdâ-yı muhzırân, Mustafa Çelebi b. Abdulkādir ve gayruhum mine’l-huzzâr.