Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 456 Hüküm no: 520 Orijinal metin no: [71b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Abdullah’ın bazı eşyalarını Ali Çelebi b. Hasan’a sattığı Mahmiye-i İstanbul’da Beyceğiz Mahallesi sâkinelerinden olup zâtı İbrahim b. Hasan ve Ömer b. Resul ta‘rîfleriyle mu‘arrefe olan Hadice bt. Abdullah nâm hatun meclis-i şer‘-i şerîf-i enverde işbu râfi‘u’l-kitâb Ali Çelebi b. Hasan mahzarında ikrâr ve takrîr-i kelâm edip akd-i âtî sudûruna değin yedimde olup mecmû‘u altı bin akçe kıymetli bir döşek ve bir yorgan ve bir sim kuşak ve bir kebe ve iki yasdık ve bir minder ve bir yan keçesi ve bir kilim ve iki tencere ve iki sahan ve bir tâbe ve bir keçe ve bir hoşâb tası ve bir hamam tası ve bir sandal kaftan ve bir sûsî alaca anterimi tarafeynden îcâb ve kabûlü hâvî bey‘-i bâtt-ı sahîh-i şer‘î ile safka-i vâhide ile mezbûr Ali Çelebi’ye elli guruşa bey‘ ve teslîm ve temlîk ol dahi vech-i meşrûh üzere iştirâ ve temellük ve kabz ve kabûl eylediğinden sonra semeni olan meblağ-ı mezbûr elli guruş mutâlebesinden mezbûr Ali Çelebi’nin zimmetini ibrâ-i âm ile ibrâ ve iskāt eyledim baʻde’l-yevm eşyâ-i muharrere-i mezbûrede kat‘â alâkam kalmayıp mezbûr Ali Çelebi’nin mülk-i müşterâsı olmuşdur dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 23 min-Recebi’l-ferd sene 1121 Şuhûdü’l-hâl: İbrahim Efendi el-İmâm, Nezir Efendi b. Receb, Eyyühüm b. Hasan, Ömer Çelebi b. Resul, Receb Çelebi b. Süleyman, Abdullah b. Abdullah, Ali b. İvaz, Hasan Çelebi b. Mustafa ve gayruhum mine’l-huzzâr.