Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 129 Hüküm no: 203 Orijinal metin no: [22a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdullah Ağa Vakfı’nın boş yerinin Tomaneriye? bt. Dimitri’ye tapulanması Vech-i tahrîr-i sicil budur ki Merhûm Abdullah Ağa evkāfına hâliyâ mütevellî olan Mahmud b. Sinan meclis-i şer‘a gelip ikrâr ve i‘tirâf edip eyitti ki mütevellîsi olduğum karye-i İstavros yerlerinden bir kıt‘a hâlî yer ki tapuya müstahik olup hudûd bir cânibi Mahmud b. Abdullah iskelesine ve bir cânibi Virvir Manol yeri kurbunda olan yerli taşa ve bir cânibi denize ve bir cânibi tarîk-ı âmmadır, tahmînen bennâ zirâ‘ı ile arzan yirmi beş zirâ‘ ve tûlen bahradır, işbu sâhibü’s-sicil Tomaneriye bt. Dimitri dört yüz on akçe resm-i tapusun alıp verdik, meblağ-ı merkūmu bilâ kusûr velâ küsûr vakıf için aldım, kabûl ve kabz ettim dedikde mukırr-ı mezbûru mukarrun lehü’l-mezkûre kıbelinden bi’l-vekâle Aleksi b. Mihal vicâhen tasdîk edip sıhhat-i akd-i tapu mukarrer olup bi’t-taleb kayd olundu. Vaka‘a’t-tahrîr fî evâili Şa‘bâni’l-mu‘azzam sene 956. Şuhûdü’l-hâl: Ahmed Çelebi b. Hasan, Mahmud b. Kemal, Turgud b. Hasan, Ali b. Veli, Abdi Fakīh b. Nebi el-imâm, Hüseyin b. Abdullah, Hüseyin Usta b. Abdullah.