Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 456 Hüküm no: 521 Orijinal metin no: [71b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abacı Hacı Abdullah Vakfı mütevellîsi Mehmed Efendi b. Mustafa’nın vakfa borcu olan İbrahim Ağa b. Hacı Ahmed Ağa’dan paranın bir kısmını teslim aldığı Mahmiye-i İstanbul’da Abacı el-Hâc Abdullah Vakfı’na mütevellî olan Mehmed Efendi b. Mustafa nâm kimesne mahfil-i kazâda işbu râfi‘u’l-vesîka İbrahim Ağa b. el-Hâc Ahmed nâm kimesne mahzarında bi’t-tevliye ikrâr ve takrîr-i kelâm edip mezbûr İbrahim Ağa’nın bâ-temessük taraf-ı vakf-ı mezbûra dört yüz guruş deyni olmağla meblağ-ı mezbûrun yüz seksen guruşunu bi’t-tevliye yedinden vakıf için ahz u kabz edip ve altmış beş guruşu dahi işbu hâzır bi’l-meclis Süleyman b. Mustafa’dan havâle etmekle kabûl edip hâlâ meblağ-ı mezbûrdan ancak yüz elli guruş deyni bâkī kalmışdır dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 18 min-Recebi’l-mürecceb sene 1121 Şuhûdü’l-hâl: Eş-Şeyh Yusuf Efendi b. Mustafa, Abdullah Çelebi b. Mehmed, Süleyman b. Mustafa, Mustafa Çelebi b. ( ), Yusuf Efendi b. Mustafa ve gayruhum mine’l-huzzâr.