Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 457 Hüküm no: 522 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hacı Mehmed b. Seyyid Mehmed’in arsası vakıf olan binasını istiğlal yoluyla Şeyh Muhyiddin-i Kocavî Vakfı’na sattığı Mahmiye-i İstanbul’da Şeyh Muhyiddin-i Kocavî Mahallesiʼnde sâkin es-Seyyid el-Hâc Mehmed b. es-Seyyid Mehmed nâm kimesne meclis-i şer‘-i şerîf-i enverde ashâb-ı hayrâtdan merhûm Şeyh Muhyiddin-i Kocavî Vakfı’na bi’l-fi‘il mütevellî olan işbu sâhibü’l-kitâb Mehmed Çelebi b. el-Hâc Ahmed nâm kimesne mahzarında ikrâr-ı tâm ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan Dilsiz Mustafa Ağa vakfı olan odalar ve bir tarafdan imâma meşrûta menzil ve bir tarafdan Hüseyin Ağa vakfı olan bostan ve bir tarafdan tarîk-i âm ile mahdûd iki bâb fevkānî oda [ve] vustânî üç bâb oda ve tahtânî bir bâb oda ve iki su kuyusu ve kenîfi muhtevî arsasının beher sene mescid-i mezbûr müezzinine meşrûta mukāta‘a-i ma‘lûmesi olup ebniyesi mülküm olan menzilimin ebniye-i memlûkesini bi-tarîkı’l-istiğlâl mütevellî-i merkūm Mehmed Çelebi’ye yüz altmış guruş ve bir zolotaya bey‘ ve teslîm ol dahi ber-vech-i muharrer iştirâ ve tesellüm ve kabz ve kabûl eyleyip semeni olan meblağ-ı mezbûr yüz altmış guruş ve bir zolotayı asl-ı mâl-ı vakf-ı mezbûrdan olmak üzere bana def‘ ü teslîm ben dahi ahz u kabz eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 23 min-Recebi’l-ferd sene 1121 Şuhûdü’l-hâl: Süleyman Efendi b. el-Hâc Yusuf el-İmâm, Murtaza Ağa b. Mehmed, Ali Çelebi b. Mehmed, el-Hâc Musa b. Mehmed, es-Seyyid Ebûbekir Çelebi b. Murtaza, Ali b. Abdullah, Ebûbekir Beşe b. Süleyman, Receb Çelebi b. Mehmed, Mustafa b. Ahmed ve gayruhum mine’l-huzzâr.