Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 458 Hüküm no: 523 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Çavuş b. Abdullah’ın kiracısı olduğu vakıf evin kira bedelinin tekrar belirlenmesi Husûs-ı âti’z-zikrin mahallinde keşf ve tahrîri bâbında sâdır olan fermân-ı şerîfe imtisâlen taraf-ı şer‘den ta‘yîn ve irsâl olunan Mevlânâ Ali Efendi hâlâ Ser-mi‘mârân-ı hâssa Mehmed Efendi ve Mehmed Halîfe ve Kâtib Mehmed Efendi ile mahmiye-i İstanbul’da Sancakdâr Hayreddin Mahallesiʼnde vâki‘ zikri âtî menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i nebevî eyledikde mahalle-i mezkûrede vâki‘ Hâce Fâtıma Hatun Câmi‘-i şerîfi’nde imâm ve menzil-i âti’l-beyânın ber-mûceb-i şart-ı vâkıf mütevellîsi olan Ali Efendi b. Ali meclis-i ma‘kūd-ı mezkûrda hâlâ menzil-i mezkûra icâreteyn-i ma‘lûmeteyn ile mutasarrıf olan sipâh çavuşlarından Yusuf Çavuş b. Abdurrahman nâm kimesne muvâcehesinde ikrâr ve takrîr-i kelâm edip ashâb-ı hayrâtdan merhûm Geczebân Mehmed Efendi’nin câmi‘-i mezkûrda imâm olanlara meşrûta vakfı olup iki tarafdan tarîk-i âm ve bir tarafdan sâbıkā Gergerîzâde menzili olup hâlâ Hasan Efendi tasarrufunda olan menzil ve bir tarafdan baʻzan câmi‘-i mezkûr havlusu ve baʻzan Fâtıma Hatun tasarrufunda olan menzil ile mahdûd hâriciyesinde tuğla döşemeli ve terekli ve iki şehnişînli bir oda ve yine tuğla döşemeli bir sagīr oda ve dehlîz ve bir çeşme ve dehlîz ve bir kemer ocaklı matbah ve matbaha muttasıl bir oda ve bir ahır ve dâhiliyesinde bir oda ve dört sofa ve üç dehlîz ve bir oda ve mağsel ve çeşme ve matbah ve kömürlük ve câmi‘-i mezkûr havlusuna nâzır bir köşk ve bi’r-i mâ ve mahtab ve havluyu müştemil olup mi‘mârûn-ı mezkûrûn mesâha eyledikleri üzere tûlen otuz sekiz zirâ‘ ve on sekiz parmak ve arzen yirmi dört zirâ‘ ve altı parmak bi-hesâb-ı şatrancî dokuz yüz otuz dokuz buçuk zirâ‘ arsası olan menzili câmi‘-i mezkûrda imâm ve ber-vech-i muharrer menzil-i mezkûrun mütevellîsi olan merhûm Mes‘ûd Efendi hayâtında menzil-i mahdûd-ı mezkûru merkūm Yusuf Çavuş’a yüz seksen guruş mu‘accele ve beher şehr kırkar akçe icâre-i müeccele ile îcâr ve teslîm ol dahi istîcâr ve kabûl edip icâreteyn-i mezkûreteyn noksan ve gabn-i fâhiş ile olmuşdur deyü hâlâ mezkûr Yusuf Çavuş’dan menzil-i mezkûrun icâre-i müeccele-i misliyyesi ile icâre-i müeccele-i misliyyesini tekmîl ettirmek üzere taleb ve da‘vâ eylediğimde ol dahi inkâr edip benim dahi ziyâdeye beyyinem olmamağla beynimizde münâza‘ât-ı kesîre cereyânından sonra mezkûr Yusuf Çavuş hüsn-i rızâsıyla cânib-i vakf-ı şerîfe yüz guruş mu‘accele ve beher şehr ellişer akçe müeccele ile istîcâr ve kabûl edip ben dahi tevliyet-i mahkiyem hasebiyle mezkûr Yusuf Çavuş’a îcâr ve teslîm ve baʻde’l-yevm menzil-i mahdûd-ı mezkûr merkūm Yusuf Çavuş’un dâhil-i havza-i tasarrufu olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’l-mer‘î vâki‘ hâli mevlânâ-yı mezkûr mahallinde ketb ü tahrîr edip ba‘dehû ma‘an ba‘s olunan Nuh Efendi ve Hüseyin b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 14 min-Recebi’l-ferd sene 1121 Şuhûdü’l-hâl: İbrahim Ağa b. Muslu, Mehmed Efendi b. Mustafa, Mehmed Beşe b. Sunullah, el-Hâc Mehmed b. İbrahim, Ebûbekir Efendi b. Ahmed, el-Hâc Hüseyin Efendi b. Ali, Osman Ağa b. Mehmed, Yunus Ağa b. Halil, Ahmed Ağa b. İsa, Mehmed Efendi b. Mustafa, Mustafa Efendi b. Abdullah, İsmail Çelebi b. Mustafa, Mehmed Çelebi b. Mehmed, Ahmed Çelebi b. Mustafa ve gayruhum mine’l-huzzâr.