Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 459 Hüküm no: 524 Orijinal metin no: [72a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Vefât eden İbrahim b. Hızır b. İlyas’ın Yuvan v. Nasto’da olan alacağını vârislerine ödemesi
Vilâyet-i Rumeli’nde Görice kazâsına tâbi‘ Koskova nâm karye ahâlîsinden iken bundan akdem vefât eden İbrahim b. Hızır b. İlyas’ın verâseti kebîr oğulları Habib Beşe ve İsa nâm kimesnelere münhasıra olduğu mütehakkık oldukdan sonra kendi tarafından asıl ve karındaşı mezbûr İsa tarafından husûs-ı âti’l-beyâna vekîl olduğu Görice ahâlîsinden İbrahim b. Mehmed ve Musa b. Ali şehâdetleriyle sâbit ve sübût-ı vekâletine hüküm lâhık olan işbu râfi‘u’l-kitâb mezbûr Habib Beşe mahfil-i kazâda Yuvan v. Nasto nâm zimmî muvâcehesinde asâleten ve vekâleten üzerine da‘vâ ve takrîr-i kelâm edip mûrisim müteveffâ-i mezbûr târih-i kitâbdan altı sene mukaddem hayâtında merkūm Yuvan’a elli guruşluk parasını ikrâz ve teslîm ol dahi iktirâz ve kabz edip kable’l-edâ mûrisimiz fevt olmağla suâl olunup meblağ-ı mezbûrun asâleten ve vekâleten alıverilmesi matlûbumdur dedikde gıbbe’s-suâl merkūm Yuvan mezbûrânın ber-vech-i muharrer verâsetlerini ikrâr lâkin deyn-i mezbûru inkâr edicek müdde‘î-i mezbûrda müdde‘âsını mübeyyine beyyine taleb olundukda udûl-i Müslimînden olup karye-i mezbûre ahâlîsinden Mustafa Beşe b. Hasan ve Abdülfettâh b. Ali nâm kimesneler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka işbu müdde‘î-i mezbûrun babası müteveffâ-i mezbûr İbrahim b. Hızır b. İlyas târih-i kitâbdan altı sene mukaddem hayâtında işbu merkūm Yuvan’a bizim huzûrumuzda elli guruşluk parasını ikrâz ve teslîm ol dahi iktirâz ve kabz ve tesellüm eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr elli guruşluk parayı müdde‘î-i mezbûra edâya merkūm Yuvan’a tenbîh-birle mâ-vaka‘a bi’t-taleb ketb olundu.
Fî 21 min-Recebi’l-mürecceb sene 1121
Şuhûdü’l-hâl: Mehmed Efendi el-Kâtib, el-Hâc Mustafa Efendi tâbi‘-i efendi, Hüseyin Beşe Çukadâr, Mehmed Çelebi b. ( ) ve gayruhum mine’l-huzzâr.
|