Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 460 Hüküm no: 525 Orijinal metin no: [72a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerâğî Hamza Camii Vakfı mütevellîsi Hasan Ağa b. Mehmed’in caminin tamirine vakfedilen paradan bir kısmının cami imamı Mehmed Efendi b. Mehmed’de kaldığı iddiasıyla açtığı davayı ispat edemedeği Mahmiye-i İstanbul’da Çerâğī Hamza Câmi‘-i şerîfi vakfına mütevellî olan Hasan Ağa b. Mehmed nâm kimesne mahfil-i kazâda câmi‘-i mezkûr imâmı işbu râfi‘u’l-vesîka Mehmed Efendi b. Mehmed nâm kimesne mahzarında takrîr-i da‘vâ ve tasvîr-i müdde‘â edip bundan akdem vefât eden el-Hâc Mustafa nâm kimesne sülüs-i mâlından yüz elli guruş câmi‘-i şerîf-i mezbûrun meremmetine sarf olunmak üzere vasiyet etmekle ba‘de vefâtihi meblağ-ı mezbûru mezbûr Mehmed Efendi bi’t-tevliye kabz ve câmi‘-i mezkûrun baʻzı meremmetine sarf edip lâkin beynimizde ma‘lûm bâkī kalan akçeyi sarf etmeyip istihlâk etmekle suâl olunsun dedikde gıbbe’s-suâl mezbûr Mehmed Efendi cevâbında fi’l-hakīka meblağ-ı mezbûr yüz elli guruşu bi’t-tevliye ve bi’l-vesâye ahz u kabz ve câmi‘-i şerîf-i mezkûrun meremmetine harc u sarf edip zimmetimde nesne bâkī kalmamışdır deyücek müdde‘î-i mezbûrun istihlâk ve te‘addîye beyyinesi olmayıp tahlîfe tâlib olmağın fi’l-vâki‘ meblağ-ı mezbûr yüz elli guruşu mesârifine sarfla istihlâk etmeyip cümlesini câmi‘-i şerîf-i mezbûrun meremmetine sarf edip yedinde meblağ-ı mezbûrdan nesne bâkī kalmadığına mezbûr Mehmed Efendi’ye yemîn teklîf olundukda ol dahi alâ-vefkı’l-mesûl yemîn biʼllâhi te‘âlâ etmeğin mûcebince müdde‘î-i mezbûr bî-vech mu‘ârazadan men‘-birle mâ-vaka‘a bi’t-taleb ketb olundu. Fî 15 min-Cumâdelâhire sene 1121 Şuhûdü’l-hâl: Mehmed Efendi b. Mustafa Efendi el-Kādı, el-Hâc Süleyman b. Yusuf, el-Hâc Yusuf b. Mustafa, el-Hâc Ali b. Mehmed, Ahmed Çelebi b. Mustafa, İbrahim Ağa b. ( ) ve gayruhum mine’l-huzzâr.