Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 460 Hüküm no: 526 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun bt. Ahmed’in dükkanını kocası Ali Çavuş b. Abdullah’ın borcuna mahsuben Ca‘fer Ağa Vakfı’na istiğlal yoluyla sattığı Mahmiye-i İstanbul’da Ca‘fer Ağa Mahallesiʼnde sâkine olup zâtı ta‘rîf-i şer‘î ile mu‘arrefe olan Ümmügülsüm Hatun bt. Ahmed meclis-i şer‘-i şerîf-i enverde mârru’z--zikr Ca‘fer Ağa Vakfı’na bi’l-fi‘il mütevellî olan işbu bâ‘isü’l-vesîka Abdurrahman Çelebi b. Hüseyin nâm kimesne mahzarında ikrâr ve takrîr-i kelâm edip zevcim işbu hâzır bi’l-meclis Ali Çavuş b. Abdullah’ın vakf-ı mezbûra altmış sekiz guruş asl-ı mâl deyni olup ben dahi meblağ-ı mezbûra bi’l-emr ve’l-kabûl kefîl olmağla hâlâ yedimde mülk ve hakkım olup mahalle-i mezbûrede vâki‘ bir tarafdan Sâliha Hatun mülkü ve iki tarafdan Ümmügülsüm Hatun mülkü ve bir tarafdan tarîk-i âm ile mahdûd bir bâb tahtânî oda ile iki kepenk bir dükkânımı mütevellî-i mezbûra bi-tarîkı’l-istiğlâl altmış guruşa bey‘ ve teslîm ve semen-i mezbûru cihet-i kefâletden deynim olan altmış sekiz guruşun altmış guruşuna takās eylediğimde ol dahi ber-vech-i muharrer iştirâ ve mukāssa ve kabûl eyledikden sonra mütevellî-i mezbûr yine mebî‘-i mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamamına değin yedi buçuk guruşa bi’t-tevliye bana îcâr ve teslîm ben dahi istîcâr ve tesellüm edip asl-ı deynden bâkī kalan sekiz guruşu târih-i kitâbdan üç gün tamamında edâya ta‘ahhüd eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 min-Recebi’l-mürecceb sene 1121 Şuhûdü’l-hâl: Mustafa Çelebi b. Şa‘ban, Hasan Çelebi b. Mustafa, Hüseyin b. Hasan, Ali b. İvaz ve gayruhum mine’l-huzzâr.