Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 461 Hüküm no: 527 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia bt. Abdullah b. Abdurrahman’ın bazı eşya ve mücevherlerini üvey oğlu Hasan Beşe b. Veli’ye sattığı Mahmiye-i İstanbul’da Derviş Ali Mahallesiʼnde sâkine Râbia bt. Abdullah b. [Abdu]rrahman hatun tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân Ahmed Beşe b. Hüseyin ve Mustafa Beşe b. Ali nâm kimesne şehâdetleriyle şer‘an sâbit olan Yusuf Çelebi b. Süleyman nâm kimesne meclis-i şer‘-i şerîf-i enverde müvekkile-i mezbûrenin üvey oğlu Hasan Beşe b. Veli nâm kimesne mahzarında ikrâr ve takrîr-i kelâm edip müvekkilem mezbûre Râbia Hatun eşyâ-i memlûkesinden üç minder ve bir döşek ve dört yorgan ve bir kebe ve iki köhne yan keçesi ve bir köhne orta keçesi ve beş yasdık ve bir neftî ferâce ve üç bogası anteri ve bir kumaş anteri ve üç kavuşdurma ve bir kumaş kaftan ve seksen zirâ‘ keten bezi ve dört sahan ve dört lenger eski tepsi ve bir sim kuşak ve bir çift incili altın küpe ve bir çift sim bilezik ve dört hatem ve iki tencere ve iki tas ve bir leğen ma‘a ibrik ve bir şam‘dânımı bi-safkatin vâhidetin mezbûr Hasan Beşe’ye altmış guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr altmış guruş mutâlebesinden mezbûr Hasan Beşe’nin zimmetini ibrâ-i âmm-ı kātı‘u’n-nizâ‘la ibrâ ve iskāt eyledim baʻde’l-yevm eşyâ-i muharrere-i mezkûre mezbûr Hasan Beşe’nin mülk-i müşterâsı olup müvekkile-i mezbûrenin kat‘â alâka ve medhali kalmamışdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 min-Recebi’l-ferd li-sene 1121 Şuhûdü’l-hâl: Fazlullah Efendi b. Ahmed Efendi, Ahmed Ağa b. İbrahim, Ömer Çelebi b. Hüseyin, Halil Çelebi b. Abdullah ve gayruhum.