Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 462 Hüküm no: 528 Orijinal metin no: [72b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Konorta v. İlya’nın Hasan Reis b. Abdülkadir’de alış-veriş hesaplarından hiçbir alacağının kalmadığının tescili Mahmiye-i İstanbul’da Balıkpazarı kurbünde sâkin Konorto v. İlya nâm Yahûdi mahfil-i kazâda işbu râfi‘u’l-kitâb Hasan Reis b. Abdulkādir nâm kimesne mahzarında ikrâr ve takrîr-i kelâm edip bundan akdem mezbûr Hasan Reis ile beynimizde nice ahz u i‘tâ vâki‘ olup hesâb ve kitâbımızı gördüğümüzde mezbûr Hasan Reis zimmetinde zuhûr eden hakkımı tamamen ahz ve istîfâ edip zimmetinde bir akçe ve bir habbe hakkım kalmayıp mezbûr Hasan Reis’in elli guruşu nâtık bende bir temessüğü olup zâyi‘ olmağla temessük-ı mezkûr zuhûr eder ise amel olunmayıp târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ-i amm-ı kātı‘u’n-nizâ‘la ibrâ ve iskāt eyledik baʻde’l-yevm birbirimiz ile vechen mine’l-vücûh ve sebeben mine’l-esbâb aslâ da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Recebi’l-ferd sene 1121 Şuhûdü’l-hâl: Mustafa b. Şa‘ban, Ali b. Bâli, Hasan b. Mustafa, Ali b. İvaz, Süleyman b. Abdullah, Osman b. Hasan ve gayruhum mine’l-huzzâr.