Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 462 Hüküm no: 529 Orijinal metin no: [72b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İzzettin köyünden Ahmed Beşe b. Muharrem’e babasından intikal eden iki tarlayı usûlsüz şekilde zapt eden İbrahim Ağa b. Hasan’ın tarlaları iade etmesi Havâss-ı Aliyye kazâsı muzâfâtından Çatalca nâhiyesine tâbi‘ İzzeddin nâm karye ahâlîsinden Ahmed Beşe b. Muharrem nâm kimesne mahfil-i kazâda İbrahim Ağa b. Hasan nâm kimesne mahzarında üzerine da‘vâ ve takrîr-i kelâm edip merhûm Sultan Bayezid Hân evkāfından olup karye-i mezbûrede vâki‘ bir tarafdan benim tarlam ve bir tarafdan mezbûr İbrahim Ağa tasarrufunda olan çayır ve bir tarafı mezbûrun tarlası ve bir tarafdan tarîk-i âm ile mahdûd iki kıt‘a tarlalar babam mezbûr Muharrem’in tasarrufunda olmağla ba‘de vefâtihi intikāl-ı âdî ile bana intikāl etmişiken ben sagīr bulunmağla mezbûr İbrahim bi-gayr-ı hakkın ahz ve zabt ve tasarruf etmekle suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr İbrahim cevâbında müteveffâ-i mezbûr hayâtında zikr olunan iki kıt‘a tarlayı beş bin akçe bedel mukābelesinde bana ferağ ve tefvîz edip ve bedel-i ferağ olan meblağ-ı mezbûru dahi yedimden ahz u kabz edip lâkin izn-i mütevellî bulunmayıp bu ana değin zabt eyledim deyü izn-i mütevellî olmadığını i‘tirâf ve müdde‘î-i mezbûr babasının bedel-i ferağı kabz eylediğini inkâr etmekle beyâna havâle olundukdan sonra mütevellî izinsiz ferağ mu‘teber olmamağla i‘tirâfı mûcebince zikr olunan iki kıt‘a tarladan kasr-ı yed edip müdde‘î-i mezbûra teslîme mezbûr İbrahim Ağa’ya tenbîh-birle mâ-vaka‘a bi’t-taleb ketb olundu. Fî 23 min-Recebi’l-mürecceb sene 1121 Şuhûdü’l-hâl: el-Hâc Mustafa Efendi, Yusuf Beşe Mübâşir, Hasan Beşe Çukadâr, Mehmed Çelebi b. ( ) ve gayruhum mine’l-huzzâr.