Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 463 Hüküm no: 530 Orijinal metin no: [72b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Konorta v. Altaz’ın ortağı Yani v. Mihal ile hiçbir alacak ve vereceğinin kalmadığı Mahmiye-i İstanbul’da Balıkpazarı kurbünde sâkin işbu bâ‘isü’s-sifr Konorta v. Altaz nâm Yahûdi mahfil-i kazâda Yani v. Mihal nâm zimmî muvâcehesinde ikrâr ve takrîr-i kelâm edip mezkûr Yani’ye bundan akdem fâidesi beynimizde munâsafa olmak üzere mudârebe tarîkiyle elli guruş bir def‘a ve yirmi beş guruş bir def‘a cem‘an mâlımdan yetmiş beş guruş def‘ ü teslîm ol dahi yedimden ahz u kabz ettiğinden sonra meblağ-ı mezbûru i‘mâl ve hâsıl olan ribhi ve asl-ı meblağ-ı mezbûr yetmiş beş guruşu bana def‘ ü teslîm ben dahi yedinden bi’t-tamam ahz u kabz eylediğimden sonra husûs-ı mezkûra ve târih-i kitâba gelince beynimizde cereyân eden ahz u i‘tâ ve mu‘âmele-i şettâ ve hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Recebi’l-ferd sene 1121 Şuhûdü’l-hâl: Ali b. İvaz, Mustafa b. Şa‘ban, Abdullah b. Abdullah, Mehmed b. Ahmed, Receb b. Şa‘ban ve gayruhum mine’l-huzzâr.