Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 463 Hüküm no: 531 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsteryo v. Anton’un komşusu Eftem v. Abranos ile ortak kullandıkları duvarın kendisine ait olduğu iddiasıyla açtığı davada haksız bulunduğu Husûs-ı âti’l-beyânın mahallinde keşf ü tahrîr ve fasl u hasmı için savb-ı şer‘den Mevlânâ İmâmzâde Mehmed Emin Efendi bâ-fermân-ı âlî ta‘yîn ve irsâl olunup ol dahi hâssa mi‘mâr halîfelerinden es-Seyyid Mustafa Halîfe b. Eyüb ve Mustafa Halîfe b. Ahmed ile mahmiye-i İstanbul’da Yedikulekapısı dâhilinde Mirâhor Mahallesiʼnde vâki‘ İsteryo v. Anton nâm zimmînin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mezbûr İsteryo zimmî meclis-i ma‘kūd-ı mezbûrda câr-ı mülâsıkı Eftem v. Abranos nâm zimmî muvâcehesinde üzerine da‘vâ ve takrîr-i kelâm edip mezbûr Eftem zimmînin menzili ile işbu benim menzilim beyninde vâki‘ mi‘mârân-ı mezbûrân mesâhası üzere tarîk-i âmdan bahçe nihâyetine varınca tûlen kırk iki zirâ‘ ve kadden tarîk-i âm tarafından altı zirâ‘ ve bahçe tarafından üç buçuk zirâ‘ taş duvar işbu benim mülk menzilimin müstakil müştemilâtından olmağla mülküm iken mezbûr Eftem zimmî duvar-ı mezbûru bi-gayr-ı hakkın tasarruf eder suâl olunup kasr-ı yedine tenbîh olunmak matlûbumdur dedikde mi‘mârân-ı mezbûrân ve Müslimîn-i mezbûrîn ile nazar olundukda duvar-ı mezbûrda mezbûr Eftem zimmînin üç aded ocak ve dört aded dolabı ve vaz‘-ı cüzû‘u olup ve müdde‘î-i mezbûr tarafında dahi ittisâl-i terbî‘î ve vaz‘-ı cüzû‘ bulunduğu müte‘ayyin oldukdan sonra gıbbe’s-suâl mezbûr Eftem zimmî cevâbında müdde‘î-i mezbûr işbu menzile ancak üç seneden beri mâlik olup müdde‘î-i mezbûr İsteryo’dan mukaddem hâlik olan Uzun Aslan zimmînin zamânında ben on yedi sene bilâ-nizâ‘ bu vech üzere tasarruf edip benden mukaddem hâlik olan Kaçko zimmî dahi elli sene mikdârı kezâlik tasarruf edip bu vech üzere duvar-ı mezbûr iki menzilin beyninde kadîmden müşterekdir deyü cevâb vericek gıbbe’l-istintak ve’l-inkâr mezbûr Eftem zimmîden takrîr-i meşrûhuna mutâbıka beyyine taleb olundukda mahalle-i mezbûre sükkânından Papa Margrid v. Kiro ve Anye? Yani v. Biyal? ve Hristo v. Salaman ve Vasil v. Gance ve Gabril v. Hristo ve Germe v. Dimitri nâm zimmîler li-ecli’ş-şehâde meclis-i ma‘kūd-ı mezbûra hâzirûn olup isre’l-istişhâd fi’l-vâki‘ işbu duvar mezbûr menzileyn-i mezkûreyn beyninde müşterek olup mezbûrân zimmîlerden mukaddem hâlik olanlar dahi elli seneden beri müşterek olmak üzere bilâ-nizâ‘ tasarruf edegelmişlerdir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ke’l-evvel iştirâken tasarruf etmek üzere mezbûrândan her birine tenbîh eylediğini mevlânâ-yı mezbûr mahallinde ketb ü tahrîr ba‘dehû ma‘an ba‘s olunan el-Hâc Hüseyin b. ( ) ve Abdullah b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 24 min-Recebi’l-ferd sene 1121 Şuhûdü’l-hâl: İbrahim Çelebi b. İsmail, el-Hâc İbrahim b. Hüseyin, Mehmed Beşe b. Mustafa, Mehmed Beşe b. el-Hâc Mustafa, Ahmed Beşe b. İbrahim ve gayruhum mine’l-huzzâr.