Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 464 Hüküm no: 532 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslihan bt. Mehmed’in bazı eşyalarını Fâtıma bt. Receb’e sattığı Mahmiye-i İstanbul’da Debbâğ Yunus Mahallesiʼnde sâkine olup zâtı Mehmed Beşe b. Yusuf ve Abdi Çelebi b. Ahmed ta‘rîfleriyle mu‘arrefe olan Neslihan bt. Mehmed nâm hatun meclis-i şer‘-i şerîf-i enverde işbu bâ‘isetü’l-kitâb Fâtıma bt. Receb nâm hatun tarafından husûs-ı âti’l-beyânı tasdîka vekîl-i şer‘îsi olan Ahmed Ağa b. Abdurrahman nâm kimesne mahzarında ikrâr ve takrîr-i kelâm edip eşyâ-i memlûkemden bir köhne yeşil çuka ferâce ve otuz dirhem mikdârı sim kuşak ve iki alaca kaftan ve iki anteri ve bir gömlek ve bir don ve bir minder ve bir yasdığımı bi-safkatin vâhidetin tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkile-i mezbûre Fâtıma Hatun’a on beş guruşa bey‘ ve temlîk ve teslîm ol dahi ber-vech-i muharrer iştirâ ve kabz ve temellük ve tesellüm ve kabûl eylediğinden sonra semeni olan meblağ-ı mezbûr on beş guruş mutâlebesinden müvekkile-i mezbûre Fâtıma Hatun’un zimmetini ibrâ-i âm ile ibrâ ve iskāt eyledim fîmâ-ba‘d eşyâ-i muharrere-i mezkûre müvekkile-i mezbûre Fâtıma Hatun’un mülk-i müşterâsı olmuşdur benim kat‘â alâka ve medhalim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Recebi’l-ferd sene 1121 Şuhûdü’l-hâl: Ahmed Ağa b. Abdullah Çörekçi, Mehmed Çelebi b. Mustafa, Ahmed Çelebi b. Mahmud Attâr, İbrahim Çelebi Suyolcu, Hüseyin Çelebi b. Ali, Mustafa Çelebi b. Mehmed, Mehmed Çelebi b. el-Hâc Hasan, Ahmed Ağa Sarraf?, İsmail Çelebi b. Mehmed Berber, Ali Çelebi b. Hertâvî?, Mehmed Beşe b. Yusuf, Abdi Çelebi b Ahmed ve gayruhum mine’l-huzzâr.