Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 465 Hüküm no: 533 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Mehmed b. Hasan’ın vârislerinden kızları Ayşe ve Fâtıma’nın babalarından intikal eden evdeki hisselerini Havvâ bt. Mehmed’e sattıkları Mahmiye-i İstanbul’da Keçeci Pîrî Mahallesiʼnde sâkin iken bundan akdem vefât eden Molla Mehmed b. Hasan nâm kimesnenin verâseti zevceleri Sâliha bt. Abdullah ve Hadice bt. Abdülkerim ile vâlidesi Asiye bt. ( ) ve sulbî oğulları Halil ve Hasan’a ve sulbiye kızları Âişe ve Fâtıma ve Hadice’ye münhasıra olup ve tashîh-i mes’eleleri üç yüz otuz altı sehmden olup sihâm-ı mezbûrdan yirmi birer sehmi zevceleri mezbûretân Sâliha ve Hatice’den her birine ve elli altı sehmi vâlidesi mezbûre Asiye’ye ve altmış sekiz sehmi oğulları mezbûrân Halil ve Hasan’dan her birine ve otuz dörder sehmi kızları mezbûrâtdan her birine isâbeti tahkīkinden sonra mezbûretân Âişe ve Fâtıma mahfil-i kazâda bâ‘isetü’l-vesîka Havvâ bt. Mehmed nâm hatunun zevci ve tarafından husûs-ı âti’z-zikri tasdîka vekîli olduğu zât-ı mezkûreyi ma‘rifet-i şer‘iyye ile ârifân İbrahim Çelebi b. el-Hâc Mustafa ve Halil Bey b. İbrahim şehâdetleriyle şer‘an sâbit olan Ali Çelebi b. Hasan nâm kimesne mahzarında her biri ikrâr ve takrîr-i kelâm edip babamız müteveffâ-i mezbûrdan müntakil mahalle-i mezbûrede vâki‘ bir tarafdan mahalle-i mezbûre imâmına süknâsı meşrûta menzil ve bir tarafdan Abdullah Çelebi menzili ve bir tarafdan tarîk-i hâs ve bir tarafdan tarîk-i âm ile mahdûd dâhiliyede fevkānî iki oda ve bir sofa ve bir matbah ve bi’r-i mâ ve kenîf ve bir mikdâr havluyu müştemil ve hâriciyede fevkānî bir odayı müştemil mülk menzilden tashîh-i mezkûr üzere bize isâbet eden altmış sekiz sehm hisse-i şâyi‘amızı müvekkile-i mezbûre Havvâ’ya tarafeynden îcâb ve kabûlü [hâvî] [73b] bey‘-i bâtt-ı sahîh-i şer‘î ile kırk guruşa bey‘ ve temlîk ve teslîm ol dahi ber-vech-i meşrûh iştirâ ve tesellüm ve temellük ve kabûl eylediğinden sonra semeni olan meblağ-ı mezbûr kırk guruşu vekîl-i mezbûr Ali Çelebi yedinden her birimiz alâ-kadri’l-hısas ahz u kabz eyledik baʻde’l-yevm menzil-i mahdûd-ı mezkûrda olan hissemiz müvekkile-i mezbûre Havvâ’nın mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfe olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Recebi’l-ferd sene 1121 Şuhûdü’l-hâl: Hasan Efendi İmâm-ı mahalle-i mezbûre, Kayyum el-Hâc Mustafa b. Ömer, Ali Çelebi b. Abdülaziz, Ali Ağa b. Ahmed, Mehmed b. Ali, Halil Bey b. İbrahim, Müezzin İbrahim Efendi b. el-Hâc Mustafa, Kara Mehmed b. Mahmud, Mehmed b. Ahmed, Mustafa Çelebi b. Nurullah, Mehmed Beşe b. Salih, Halil b. Mehmed ve gayruhum mine’l-huzzâr.