Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 466 Hüküm no: 535 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Mehmed b. Hacı Veli’nin sağlam dişini çeken Berber Mustafa Çelebi b. Mahmud’a açtığı davada on guruş alarak sulh olduğu Mahmiye-i İstanbul’da Çakır Ağa Mahallesi sâkinelerinden Ümmühani bt. Mehmed b. el-Hâc Veli tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân İbrahim Çelebi b. el-Hâc Mustafa ve Kara Mehmed b. Mahmud nâm kimesneler şehâdetleriyle şer‘an sâbit olan Ahmed Efendi b. Osman nâm kimesne mahfil-i kazâda işbu râfi‘u’l-kitâb Berber Mustafa Çelebi b. Mahmud nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre bundan akdem merkūm Berber Mustafa’ya bir çürük dişini ihrâc ettirmek murâd eylediğinde mârru’z--zikr çürük dişin yanında olan sağ ve sâlim azı dişimi bi-gayr-ı hakkın ihrâc etmişdin deyü mûceb-i şer‘îsini da‘vâ eylediğinde beynlerinde münâza‘ât-ı kesîre vâkı‘a olmuş idi el-hâletü hâzihî beynlerine muslihûn tavassut edip da‘vâ-yı mezkûresinden on guruş üzerine inşâ-i akd-i sulh eylediklerinde ol dahi sulh-ı mezbûru kabûl ve bedel-i sulh olan meblağ-ı mezbûr on guruşu mezbûr Mustafa Çelebi yedinden tamamen ahz u kabz edip husûs-ı mezbûra müte‘allika âmme-i de‘âvî ve mutâlebât ve eymân ve muhâsamâtdan mezbûr Mustafa’nın zimmetini ibrâ ve iskāt eyledi baʻde’l-yevm husûs-ı mezkûra müte‘allika vechen mine’l-vücûh ve sebeben mine’l-esbâb kat‘â da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Recebi’l-ferd sene 1121 Şuhûdü’l-hâl: Attâr el-Hâc Mustafa, Berber Hasan Çelebi, Berber Mustafa Çelebi, Fazlullah Efendi, Mustafa Çelebi b. Şa‘ban, Ali b. İvaz ve gayruhum mine’l-huzzâr.