Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 467 Hüküm no: 536 Orijinal metin no: [73b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah b. Mustafa’nın Elmalı kazasındaki tarlalarını Hacı Osman b. Mehmed’e sattığı Mahmiye-i İstanbul’da İbn-i Meddâs Mahallesiʼnde sâkin Abdullah b. Mustafa nâm kimesne meclis-i şer‘-i şerîf-i enverde işbu bâ‘isü’l-kitâb el-Hâc Osman b. Mehmed nâm kimesne mahzarında ikrâr ve takrîr-i kelâm edip vilâyet-i Anadolu’da Elmalı kazâsına tâbi‘ Yeniçeri nâm karye sınırı dâhilinde vâki‘ lede’l-ahâlî ve’l-cîrân ma‘lûmetü’l-hudûd ve’l-kıt‘a tarlalar ile’l-vefât babam müteveffâ-i mezbûrun taht-ı tasarrufunda olup ba‘de vefâtihi intikāl-ı âdî ile bana intikāl etmekle zikri mürûr eden tarlalarımı ve yine kazâ-i mezbûra tâbi‘ ve Şah nâm karye sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd bir kıt‘a tarlamı bâ-ma‘rifet-i sâhib-i arz yirmi beş guruş bedel mukābelesinde mezbûr el-Hâc Osman’a ferağ ve tefvîz ol dahi ber-vech-i muharrer tefevvüz ve kabûl eylediğinden sonra bedel-i mezbûr yirmi beş guruşu mezbûr el-Hâc Osman yedinden tamamen ahz u kabz eyledim baʻde’l-yevm zikr olunan tarlalar mezbûr el-Hâc Osman’ın hakk-ı müfevvazı olmuşdur mahallinde kabz ve tasarrufa mezbûr el-Hâc Osman’ı taslît eyledim emsâli gibi mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Şa‘bâni’l-mu‘azzam sene 1121 Şuhûdü’l-hâl: Es-Seyyid Mehmed Efendi Dedezâde el-Müderris, Fahrü’l-kuzât Ali Efendi b. Mustafa, İbrahim b. Osman, Hacı Ahmed b. Ahmed, diğer el-Hâc Ahmed b. Mehmed, Ali Beşe b. Mustafa, Emir Hacı Mustafa b. Mehmed, Osman Beşe b. Hüseyin, Mehmed b. Hüseyin, İbrahim b. Hızır ve gayruhum mine’l-huzzâr.