Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 479 Hüküm no: 542 Orijinal metin no: [77b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İbrahim Ağa b. Halil’in komşusu Ahmed Çelebi b. Kenan’ın evinin oluklarını ve yıkılmaya yüz tutan duvarını kendi imkanları ile yenileyeceği Husûs-ı âti’l-beyânın mahallinde keşf ve tahrîri bâbında fermân-ı şerîf sâdır olmağın imtisâlen-leh savb-ı şer‘-i enverden irsâl olunan Mevlânâ Ali Efendi b. Sunullah hâssa mi‘mârlardan Küçük Mehmed Halîfe b. Ali ve Ali Halîfe b. Abdullah ile mahmiye-i İstanbul’da Çadırcı Ahmed Mahallesiʼnde vâki‘ yine Çadırcı Ahmed Vakfı’ndan Câbî Ahmed Çelebi b. Kenan’ın tasarrufunda olan menzile varıp zeyl-i kitâbda mektûbü’l-esâmî Müslimîn huzûrunda akd-i meclis-i şer‘-i nebevî eyledikde mahalle-i mezkûre sükkânından olup yine vakf-ı mezkûrdan menzil-i âhara mutasarrıf olan el-Hâc İbrahim Ağa b. Halil nâm kimesne meclis-i ma‘kūd-ı mezkûrda işbu râfi‘u’l-vesîka mezkûr Ahmed Çelebi b. Kenan muvâcehesinde vakf-ı mezbûra bi’l-fi‘il mütevellî olan mahalle-i mezkûre imâmı Abdullah Efendi b. Mehmed hâzır olduğu hâlde takrîr-i kelâm ve tâʻbir ani’l-merâm edip mezkûr Ahmed Çelebi’nin tasarrufunda olan menzil ile benim tasarrufumda olan menzil birbirine muttasıl bir vakıfdan olup benim tasarrufumda olan menzilin kenîfi mezkûr Ahmed Çelebi’nin tasarrufunda olan menzilin <> duvarı içine kadden iki buçuk zirâ‘ ve tûlen bir zirâ‘ on sekiz parmak ve arzen on sekiz parmak mahalde olup mezkûr Ahmed Çelebi’nin tasarrufunda olan menzilin kârîzi mahall-i mezkûrda olan benim kârîzime cereyân edip tarîk-i âmdan büyük kârîze cereyân edegelmişiken hâlâ mezkûr Ahmed Çelebi zikr olunan duvarda olan mahall-i mezkûru binâ ve sed etmekle ben dahi mezkûr Ahmed Çelebi’nin kârîzinin yolunu bi’l-külliye sed etmişidim binâen alâ-zâlik beynimizde nizâ‘-ı küllî vâki‘ olmuş idi el-hâletü hâzihî ma‘lûmum oldu ki menzileyn-i mezkûreyn bir vakıfdan olup vakıfda tasarruf mütevellîye mahsûs olmağla benim tasarrufum nâfiz olmadığına binâen benim rızâm ile ve vakf-ı mezkûr mütevellîsi mezkûr Abdullah Efendi’nin izniyle mezkûr Ahmed Çelebi kârîzini dilerse vaz‘-ı kadîmi üzere icrâ ve dilerse kendi duvarı tahtında tarîk-i âmda olan benim kârîzime ilhâk ve icrâ eylesin deyü ikrâr u i‘tirâf eylediğinden mâ‘adâ mezkûr Ahmed Çelebi’nin sakfı üzerinde olan saçağının oluklarını tevsî‘a ve inhidâma meyleden duvarını tecdîde ve bellâʻasında olan zararını def‘e mezkûr el-Hâc İbrahim hüsn-i rızâsı ile ta‘ahhüd etmeğin vâki‘ hâli mevlânâ-yı mezkûr mahallinde ketb ü tahrîr edip ba‘dehû ma‘an ba‘s olunan el-Hâc Hüseyin b. Abdullah ve diğer Hüseyin b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 24 min-Recebi’l-ferd sene 1121 Şuhûdü’l-hâl: Zekâî Mustafa Efendi [b.] Hasan, Mehmed Ağa b. el-Hâc Receb Uşşakī, Abdullah Efendi b. Mehmed, Solak Mehmed Ağa b. Mustafa, Mustafa Ağa b. Muhyiddin, Receb Çelebi b. İbrahim, Süleyman Çelebi b. Mustafa Efendi, İbrahim Çelebi b. Abdülgani, Salih Efendi el-Müezzin, Mumcu Mehmed Beşe b. Hüseyin, Hüseyin b. Mehmed, Yusuf b. Mehmed, Ahmed Çelebi b. Mustafa ve gayruhum mine’l-huzzâr.