Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 481 Hüküm no: 544 Orijinal metin no: [77b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Mustafa’nın kendi vakfı olup tekrar kiraladığı evin kira bedelinde gabn-i fâhiş olduğu iddiasıyla açtığı davada haksız bulunduğu Mahmiye-i İstanbul’da Çakır Ağa Mahallesiʼnde sâkin Mehmed Çelebi b. Mustafa nâm kimesne mahfil-i kazâda kendi vakfına meşrûtiyet üzere mütevellî olan işbu râfi‘u’l-kitâb el-Hâc Mustafa b. el-Hâc Mehmed nâm kimesne mahzarında üzerine da‘vâ ve takrîr-i kelâm edip târih-i kitâbdan yirmi bir ay mukaddem mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd dâhilen fevkānî ve tahtânî [78a] iki bâb oda ve iki sofa ve bir bodrum ve bir mikdâr havlu ve hâricen bir bâb oda ve bir kenîf ve bir mikdâr havluyu müştemil menzili mütevellî-i mezbûr taraf-ı vakfdan yevmî birer akçe icâre-i müeccele ve üç yüz elli guruş mu‘accele olmak üzere sâir mütevellîler îcârı gibi bana îcâr ve teslîm ben dahi istîcâr ve tesellüm eylediğimden sonra mu‘accele-i mezbûreyi mütevellî-i mezbûr vakıf için yedimden ahz u kabz edip ve menzil-i mezkûra müceddeden bir tahta-pûş dahi binâ eylemişidim hâlâ menzil-i mezkûr tağrîr ve gabn-i fâhiş ile olmağın mütevellî-i mezbûra suâl olunup mu‘accele-i mezbûr ile masrûfum olan meblağ-ı ma‘lûm mikdârı bana def‘ ü teslîm ve menzili geri vakıf için yedimden ahz eylemek matlûbumdur dedikde müdde‘î-i mezbûrun takrîr-i meşrûhu üzere vakıfda tağrîr ve gabn-i fâhiş da‘vâsı cârî olmayıp mütevellî-i mezbûr el-Hâc Mustafa’ya suâl dahi tevcîh etmemeğin müdde‘î-i mezbûr bî-vech mu‘ârazadan men‘-birle mâ-vaka‘a bi’t-taleb ketb olundu. Fî 2 min-Şa‘bâni’l-mu‘azzam sene 1121 Şuhûdü’l-hâl: Ömer Çavuş b. Mahmud el-Mübâşir, Ali Çelebi b. İvaz, Hasan Çelebi b. Mustafa, Mustafa Çelebi b. Şa‘ban, Ali Çelebi b. Bâli ve gayruhum mine’l-huzzâr.