Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 481 Hüküm no: 545 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Panayot’un kızı Panayota’ya ait evin yarısını Sava v. Yuvan’a sattığı Mahmiye-i İstanbul’da Fenerkapısı dâhilinde Abdi Subaşı Mahallesiʼnde sâkine Panayota nâm Nasrâniyenin babası ve tarafından husûs-ı âti’l-beyânı ikrâra vekîl olduğu şahs-ı mezbûreyi ma‘rifet-i şer‘iyye ile ârifân Safer v. Mirata ve Hristodoli v. Dimitri nâm zimmîler şehâdetleriyle şer‘an sâbit olan Yamandi v. Panayot nâm zimmî mahfil-i kazâda işbu râfi‘u’s-sifr Sava v. Yuvan nâm zimmî muvâcehesinde bi’l-vekâle ikrâr ve takrîr-i kelâm edip akd-i âti’z-zikrin sudûruna değin kızım müvekkilem mezbûrenin yedinde mülk ve hakkı olup mahalle-i mezbûrede vâki‘ bir tarafdan Saltanata menzili ve bir tarafdan Yasomine menzili ve bir tarafdan Safer menzili ve bir tarafdan baʻzan Vanî Efendi değirmeni ve baʻzan tarîk-i âm ile mahdûd fevkānî bir bâb oda ve tahtânî bir bâb oda ve bir kenîf ve bir mikdâr havluyu müştemil mülk menzilin nısf-ı şâyi‘ini tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Sava’ya yüz on beş guruşa bey‘ ve temlîk ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr yüz on beş guruşu mezbûr Sava yedinden tamamen ahz u kabz eyledi baʻde’l-yevm menzil-i mezkûrun nısf-ı şâyi‘i mezbûr Sava’nın mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Şa‘bâni’l-mu‘azzam li-sene ihdâ ve işrîn ve miʼete ve elf. Şuhûdü’l-hâl: Mustafa Çelebi b. Şa‘ban, Ali Çelebi b. Bâli, Hasan b. Mustafa, Ali Çelebi b. İvaz, Süleyman b. Abdullah ve gayruhum mine’l-huzzâr. Safer Kalfa v. Galender ve Serkiz v. Arzuman ve Kiryako v. Abraham ve Papa İstati v. İstati ve Sava v. Lefter.