Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 482 Hüküm no: 546 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdülkadir’in ev satışıyla ilgili Zeytinci Hüseyin b. Ahmed ile Mehmed b. Abdurrahman’a açtığı davadan feragat ettiği, onların da ölünceye kadar Fâtıma Hatun’a bakmayı taahhüt ettikleri Mahmiye-i İstanbul’da Müftî Ali Çelebi Mahallesi sâkinelerinden olup zâtı ta‘rîf-i şer‘î ile mu‘arrefe olan Fâtıma bt. Abdulkādir nâm hatun meclis-i şer‘-i şerîf-i enverde işbu râfi‘u’l-kitâb Zeytinci Hüseyin b. Ahmed ve Mehmed [b.] Abdurrahman nâm kimesneler mahzarında ikrâr ve takrîr-i kelâm edip merhûm Memikzâde Efendi vakfına ayda yirmi beş akçe icâre-i müeccelesi olup mahmiye-i mezbûrede Tevkī‘î Ca‘fer Mahallesiʼnde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât taht-ı tasarrufumda olan menzilimi fevt oluncaya değin beni infâk etmek üzere mezbûr Hüseyin’e izn-i mütevellî ile bundan akdem meccânen ferağ ve tefvîz merkūm Hüseyin dahi ba‘de’t-tefevvüz ve’l-kabûl menzil-i mezbûru işbu mezbûr Mehmed’e altmış guruş bedel mukābelesinde ferağ ve tefvîz ol dahi ba‘de’t-tefevvüz bedel-i mezbûru kabz etmekle mezbûr Hüseyin beni infâk etmeyip menzil-i mezbûru merkūmân Hüseyin ve Mehmed’den taleb ve da‘vâ eylediğimde beynimizde nizâ‘-ı küllî cereyân etmişidi hâlâ ben da‘vâ-yı mezkûremden fâriğ[a] olup husûs-ı mezkûra müte‘allika olan âmme-i da‘vâdan mezbûrân Hüseyin ve Mehmed’in zimmetlerini ibrâ-i âm ile ibrâ ve iskāt eylediğimden sonra mezbûr Hüseyin ve Mehmed mahfil-i kazâda mezbûre Fâtıma Hatun mahzarında her biri ikrâr ve takrîr-i kelâm edip mezbûre Fâtıma Hatun fevt oluncaya değin kendi mâlımızdan teberru‘an mezbûreyi infâk etmek üzere her birimiz ta‘ahhüd ve iltizâm eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min-Şa‘bâni’l-mu‘azzam sene 1121 Şuhûdü’l-hâl: Halil Çelebi b. Muslu, Ahmed b. Mehmed el-Mübâşir, Mustafa Beşe b. Hasan, Hüseyin Çelebi b. Ahmed, Mehmed Çelebi b. Ali, Ömer Çelebi b. Abdullah, Mustafa b. Şa‘ban, Ali Çelebi b. İvaz, Hasan Çelebi b. Mustafa ve gayruhum mine’l-huzzâr.