Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 483 Hüküm no: 547 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mehmed’in geçinemediği kocası Osman b. Abdullah b. Abdurrahman’dan boşandığı <> Mahrûse-i Galata muzâfâtından kasaba-i Tophâne’de Firuz Ağa Mahallesiʼnde sâkine zâtı mahmiye-i İstanbul’da Hoca Hayreddin Mahallesi sâkinlerinden Hasan b. Hüseyin ve Mustafa b. Mehmed ta‘rîfleriyle mu‘arrefe olan Rukiye bt. Mehmed nâm hatun meclis-i şer‘de zevc-i dâhili işbu râfi‘u’l-vesîka Osman b. Abdullah b. Abdurrahman tarafından husûs-ı âti’z-zikre vekîl olduğu mezbûrân Hasan ve Mustafa nâm kimesneler şehâdetleriyle şer‘an sâbit olan Mehmed b. Abdullah nâm kimesne mahzarında ikrâr ve takrîr-i kelâm edip zevcim müvekkil-i mezbûr Osman ile beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan yetmiş guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere vekîl-i mezbûr ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer bi’l-vekâle hul‘-ı mezkûru baʻde’l-kabûl hukūk-ı zevciyete müte‘allika âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Şa‘bâni’l-mu‘azzam sene 1121 Şuhûdü’l-hâl: Ali b. İvaz, Mehmed b. Ahmed, Abdullah b. Abdullah, Mustafa b. Şa‘ban, Receb b. Şa‘ban ve gayruhum mine’l-huzzâr.