Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 484 Hüküm no: 548 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Receb’in üvey babası Ahmed b. Mustafa’ya hediye ettiği Mushaf’ı onun da başkasına hediye etmesi üzerine açtığı davada sulh oldukları Mahmiye-i İstanbul’da Ali Paşa-yı Atîk Mahallesiʼnde sâkine olup zâtı ba‘de’t-ta‘rîfi’ş-şer‘î Emine bt. Receb nâm hatun mahfil-i kazâda üvey babası işbu bâ‘isü’l-kitâb Ahmed b. Mustafa nâm kimesne mahzarında ikrâr ve takrîr-i kelâm edip bundan akdem mezbûr Ahmed’e hediyesi beynimizde ma‘lûm bir Mushaf-ı şerîfi bi-tarîkı’l-emâne def‘ ü teslîm ol dahi yedimden ahz u kabz ve âhara hediye-i ma‘lûme ile itlâf eylemişidi deyü taleb ve da‘vâ sadedinde olduğumda beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden mezbûr Ahmed ile beni iki yüz akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki yüz akçeyi mezbûr Ahmed yedinden tamamen ahz u kabz edip husûs-ı mezbûra müte‘allika âmme-i da‘vâdan mezbûr Ahmed’in zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 min-Şa‘bâni’l-mu‘azzam sene 1121 Şuhûdü’l-hâl: Mustafa b. Şa‘ban, Ali Çelebi b. İvaz, Abdullah b. Abdullah, Ali Çelebi b. Bâli, Süleyman b. Abdullah, Ali b. Abdullah ve gayruhum mine’l-huzzâr.