Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 484 Hüküm no: 549 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Bey b. İbrahim’in Çukurbostan Mahallesi’nde vakıf arsa üzerinde bulunan menzildeki hissesini Abdurrahman Beşe b. Hüseyin’e sattığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden Mevlânâ Ahmed Efendi b. Osman irsâl olunup ol dahi mahmiye-i İstanbul’da Sultan Selim kurbünde Çukurbostan Mahallesiʼnde vâki‘ bir tarafdan Fâtıma Hatun mülkü ve bir tarafdan diğer Fâtıma Hatun mülkü ve bir tarafdan tarîk-i hâs ve bir tarafdan tarîk-i âm ile mahdûd üç bâb fevkānî oda ve bir sofa ve bir bâb tahtânî oda ve bir kiler ve bir bi’r-i mâ ve havluyu müştemil arsasının senede Sivasî Efendi Vakfı’na otuz akçe mukāta‘a-i kadîmesi ve ebniyesi Hüseyin Bey b. İbrahim’in mülkü olan menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i nebevî eyledikde mezbûr Hüseyin meclis-i ma‘kūd-ı mezbûrda işbu sâhibü’l-kitâb Abdurrahman Beşe b. Hüseyin mahzarında ikrâr ve takrîr-i kelâm edip akd-i âtî sudûruna değin menzil-i mahdûd-ı mezkûrun dört sehm i‘tibârıyla üç sehm hisse-i şâyi‘ası irsen ve şirâen benim mülk ve hakkım olmağın mârru’z--zikr üç sehm hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Abdurrahman Beşe’ye doksan guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve tesellüm ve temellük ve kabz ve kabûl eylediğinden sonra semeni olan meblağ-ı mezbûr doksan guruşu mezbûr Abdurrahman Beşe yedinden tamamen ahz u kabz eyledim baʻde’l-yevm menzil-i mahdûd-ı mezkûrda olan üç sehm hisse-i şâyi‘ada benim kat‘â alâka ve medhalim kalmayıp mezbûr Abdurrahman Beşe’nin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Çukadâr Mehmed Beşe b. Osman ve Muhzır Mehmed b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 2 min-Şa‘bâni’l-mu‘azzam sene 1121 Şuhûdü’l-hâl: Mustafa Efendi b. Musa, Mehmed Çelebi b. Hasan, İsmail Çelebi b. Ali, Abdullah Efendi b. Ali, Müezzin Mehmed Çelebi ve gayruhum mine’l-huzzâr.