Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 485 Hüküm no: 550 Orijinal metin no: [78b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Muhyiddin Kocavî Mescidi’nde ve bitişiğindeki medresede yapılan tamirat ve yapılan masrafların tespiti Husûs-ı âti’z-zikrin mahallinde keşf ve tahrîri için bi’l-iltimâs bu fakīr hâssa mi‘mârlarından es-Seyyid Mustafa Halîfe b. Eyüb ile mahmiye-i İstanbul’da ashâb-ı hayrâtdan merhûm Şeyh Muhyiddin Kocavî Vakfı olan mescid-i şerîfe varıp akd-i meclis-i şer‘-i nebevî olundukda vakf-ı mezbûr mütevellîsi olan işbu bâ‘isü’l-kitâb es-Seyyid Hacı Mehmed b. Mehmed ile zikri âtî ta‘mîrât için kıbel-i şer‘den nâzır nasb u ta‘yîn olunan vakf-ı mezbûr kâtibi Akıllı Mehmed Efendi b. Hüseyin ve mescid-i mezbûr imâmı Süleyman Efendi b. Yusuf nâm kimesneler meclis-i ma‘kūd-ı mezkûrda her biri takrîr-i kelâm ve tâʻbir ani’l-merâm edip mescid-i mezbûrun mürûr-ı eyyâm ile üzerinde sakfı ve derûnunda olan tavanı ve tahta döşemeleri ve camları ve badana ve boyaları ve taşrada olan sofa tuğla ve sakf tuğraları ve abdesthâne ve musluk ve sâir mevâzi‘-i adîdesi harâb ve ta‘mîre muhtâc olup ve merhûm-ı mûmâ-ileyhin medfeni kurbünde vâki‘ mescid-i mezbûr ve medrese odalarının dahi kenîfleri kârîzi olmamağla merhûm Hüseyin Ağa Vakfı olan kebîr kârîze müntehî olunca müceddeden otuz yedi kulaç kâriz binâ ve ihdâsına dahi eşedd-i ihtiyâc ile muhtâc olmağın minvâl-i muharrer üzere tecdîd ve ta‘mîre bundan akdem kıbel-i şer‘den yedimize izin hücceti verilmekle biz dahi mâl-ı vakf-ı mezbûr ile mescid-i mezbûru ber-vech-i muharrer tecdîd ve ta‘mîr etmişizdir hâlâ cânib-i şer‘den keşf ve müşâhede ve mertebe-i masrûfumuz tahmîn-i sahîh ile tahmîn ve takvîm olunmak murâdımızdır dediklerinde mi‘mâr-ı mezbûr mescid-i mezbûrun tecdîd ve ta‘mîr olunan mevâzi‘ini mesâha ve takvîm eyledikde tûlen yirmi dört ve arzen yirmi bi-hesâb-ı terbî‘î dört yüz seksen zirâ‘ pedavrası cedîd ve etrâf saçakları meremmet ve kiremidi mahlût sakf zirâ‘ı onar akçeden dört bin sekiz yüz akçe ve tûlen on ve arzen dokuz bi-hesâb-ı terbî‘î yüz on yedi zirâ‘ binârlaması mahlût devr şişeli iki kat yağlı sülügen boyalı çam tahtası cedîd tavan zirâ‘ı ellişer akçeden beş bin sekiz yüz elli akçe ve tûlen on üç ve arzen üç bi-hesâb-ı mezbûr otuz dokuz zirâ‘ tavanda yağlı sülügen boyalı devr şişe zirâ‘ı yirmişer akçeden yedi yüz seksen akçe ve tûlen ve arzen bi-hesâb-ı mezbûr beş zirâ‘ mahfilde cedîd sülügen boya zirâ‘ı yirmişer akçeden yüz akçe ve tûlen ve kadden on üç zirâ‘ mahfilde bir parmaklık ve sütûnlar sülügen boya zirâ‘ı yirmişer akçeden iki yüz altmış akçe ve tûlen ve arzen bi-hesâb-ı mezbûr altmış sekiz zirâ‘ derûn-ı mescidde kirişlemesi beylik taban meşe ağa tahtası döşeme zirâ‘ı kırkar akçeden iki bin yedi yüz yirmi akçe ve bi-hesâb-ı terbî‘î altı zirâ‘ mahfil tahtında cedîd sülügen boya ve zülbaharlı tahta perde zirâ‘ı yirmişer akçeden yüz yirmi akçe ve iki kat silinmek üzere altı çift duvar camları beher biri onar akçeden yüz yirmi akçe ve tûlen ve arzen kırk sekiz zirâ‘ cam direklerinde boya nakşı tecdîdi zirâ‘ı beşer akçeden iki yüz kırk akçe ve iki yüz otuz zirâ‘ derûn-ı mescidde mermer badana zirâ‘ı birer akçeden iki yüz otuz akçe ve terbî‘î yirmi sekiz zirâ‘ demir pencerelerde yağlı ve çengârî ve sülügen boya zirâ‘ı yirmişer akçeden beş yüz altmış akçe ve fevkānî ve tahtânîde yirmi dört orta tahta cam beher biri on beşer akçeden üç yüz altmış akçe ve kırk iki zirâ‘ pencere üzerlerinde ve kanadlarında yağlı sülügen ve çengârî boya zirâ‘ı yirmişer akçeden sekiz yüz kırk akçe [79a] ve terbî‘î otuz zirâ‘ cam çârçûbeleri dâhil ve hâricinde aşı yağlı boya tecdîdi zirâ‘ı onar akçeden üç yüz akçe ve terbî‘î otuz bir zirâ‘ tırabzanlarda sülügen ve çengârî boya zirâ‘ı on beşer akçeden dört yüz altmış beş akçe ve on yedi müdevver sırça cam beher biri üçer akçeden elli bir akçe ve derûn-ı mihrâbda on zirâ‘ sülügen ve çengârî boya zirâ‘ı yirmişer akçeden iki yüz akçe ve tûlen ve arzen seksen dört zirâ‘ taşrada devr şişeli iki kat yağlı sülügen boyalı mahlût binar çam tahtası cedîd tavan zirâ‘ı kırkar akçeden üç bin üç yüz altmış akçe ve terbî‘î yedi zirâ‘ parmaklık üzerinde sülügen boya tecdîdi zirâ‘ı yirmişer akçeden yüz kırk akçe ve fevkānî kapıda ve kanadlarda on altı zirâ‘ siyah boya zirâ‘ı onar akçeden yüz altmış akçe ve şerbetlikde üç zirâ‘ sülügen ve çengârî boya zirâ‘ı yirmişer akçeden altmış akçe ve def‘a kapıda sülügen ve çengârî yedi zirâ‘ boya zirâ‘ı yirmişer akçeden yüz kırk akçe ve terbî‘î altmış zirâ‘ taşra tuğrada mevc boya tecdîdi zirâ‘ı on beşer akçeden dokuz yüz akçe ve taşrada sekiz zirâ‘ nîm şişeli iki kat yağlı boyalı cedîd tahta perde zirâ‘ı yirmişer akçeden yüz altmış akçe ve terbî‘î yirmi sekiz zirâ‘ taşrada iki tarafı aşı boyalı mahlût parmaklık zirâ‘ı yirmişer akçeden beş yüz altmış akçe ve on beş zirâ‘ taşra kapıda ve perdede sülügen ve çengârî boya tecdîdi zirâ‘ı on beşer akçeden iki yüz yirmi beş akçe ve taşrada yüz yirmi zirâ‘ badana zirâ‘ı birer akçeden yüz yirmi akçe ve terbî‘î kırk iki zirâ‘ parmaklık üzerinde cedîd sakf yirmişer akçeden sekiz yüz kırk akçe ve kırk iki zirâ‘ tavanda sülügen ve çengârî boya tecdîdi onar akçeden dört yüz yirmi akçe ve elli bir zirâ‘ musluk etrâfında aşı boyalı cedîd parmaklık zirâ‘ı otuzar akçeden bin beş yüz otuz akçe ve on yedi zirâ‘ etrâfı meremmet taş duvar zirâ‘ı onar akçeden yüz altmış akçe ve ot taşından dahi bir cedîd kuyu bileziği yüz seksen dokuz akçe ve sekiz zirâ‘ muslukda lökün ma‘a kalay otuzar akçeden iki yüz kırk akçe ve meremmet-i musluk ma‘a kened yüz yirmi akçe ve dört musluk lülesi yüz on iki akçe ve yirmi zirâ‘ desdeklerde ve sütûnlarda aşı boya zirâ‘ı onar akçeden iki yüz akçe ve altı zirâ‘ medrese kapısında siyah yağlı aşı boya zirâ‘ı onar akçeden altmış akçe ve altı zirâ‘ medrese kapısı üzerinde cedîd sakf zirâ‘ı yirmişer akçeden yüz yirmi akçe ve medrese tarafında duvar badanası iki yüz elli dokuz akçe ve on beş zirâ‘ medrese tarafında meremmet-i duvar zirâ‘ı on beşer akçeye olmak üzere iki yüz yirmi beş akçe ve otuz üç zirâ‘ kenîflerde tahta perde zirâ‘ı onar akçeden üç yüz otuz akçe ve altı zirâ‘ cedîd tahta döşeme yirmişer akçeden yüz seksen akçe ve beş zirâ‘ gasilhânede meremmet-i taş duvar onar akçeden elli akçe ve iki zirâ‘ cedîd tahta döşeme yirmişer akçeden kırk akçe ve otuz iki zirâ‘ kenîfler sakfı üzerinde akdarma-i kiremid üçer akçeden doksan altı akçe ve zikri mürûr eden kenîflerden merhûm Hüseyin Ağa Vakfı olan kebîr kârîze varınca otuz yedi kulaç cedîd kârîzin beher kulacı yüz ellişer akçeden beş bin beş yüz elli akçe ve tecdîd-i kaldırım üç yüz doksan dört akçe ve berây-ı mu‘temed ve nâzır yüz yirmi akçe ve berây-ı mu‘temed mütevellî-i Ayasofya yüz seksen akçe ve yevmiye-i suyolcu altı yüz akçe ve kâriz ilhâkına izin için Hüseyin Ağa Vakfı mütevellîsine altı yüz otuz akçe ve ihrâc-ı mezbele seksen sekiz akçe ve berây-ı kandil zenciri otuz dört akçe ve berây-ı mu‘temedân ve ta‘âmiye ve harc-ı müteferrika ve mesârif-i lâzıme iki bin yedi yüz seksen bir akçe ki min-haysü’l-mecmû‘ kırk bin akçe ile ancak husûle gelir bundan noksan ile husûlü mümkün değildir deyü mi‘mâr-ı mezbûr haber verip ve zeyl-i kitâbda muharrerü’l-esâmî bî-garaz Müslimîn dahi icmâ‘ ve ittifâk etmeğin mâ-vaka‘a bi’t-taleb ketb olundu. Fî 15 min-Cumâdelâhire sene 1121 Şuhûdü’l-hâl: el-Hâc Ali b. Abdullah, Mehmed Efendi b. Yusuf, Süleyman Çelebi b. Hüseyin, es-Seyyid Mustafa Çelebi b. Eyüb Çelebi, Molla Mehmed b. Abdulkādir, Ali Beşe b. Abdurrahim, Mehmed Halîfe b. Mustafa el-Müezzin, el-Hâc Süleyman Ağa b. el-Hâc Ömer, el-Hâc Abdullah b. Ali, el-Hâc Musa b. Mehmed, el-Hâc Hasan b. Mustafa, Mehmed Çelebi b. el-Hâc Mehmed, Murtaza Ağa b. Mehmed, Receb Çelebi b. Mehmed, es-Seyyid Mustafa Çelebi b. es-Seyyid Hacı Mehmed, Mehmed b. Ahmed, Ebûbekir Beşe b. Mahmud, Hüseyin Bey b. Mehmed ve gayruhum mine’l-huzzâr.