Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 487 Hüküm no: 551 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kör Ali Ağa vakfından Kapdan Sinan Paşa Mahallesi’ndeki çeşmenin suyunu kesip mütevellîsi olduğu Rahime Hatun bt. Abdullah’ın hamamına akıtan Mehmed b. Salih’in yaptığı müdahalenin önlenerek suyun tekrar çeşmeye bağlanması Husûs-ı âti’l-beyânın mahallinde ketb ü tahrîr ve fasl [u] hasmı için fermân-ı âlî sâdır olmağın imtisâlen-leh savb-ı şer‘den Mevlânâ ( ) irsâl olunup ol dahi Su nâzırı Osman Ağa tarafından Suyolcular kethüdâsı el-Hâc Hüseyin Ağa ile mahmiye-i İstanbul’da Yenibahçe kurbünde Kapudan Sinan Paşa Mahallesi’nde Mehmed Ağa nâm kimesnenin menziline varıp zeyl-i sahîfede mektûbü’l-esâmî Müslimîn mahzarlarında akd-i meclis-i şer‘-i kavîm ettikde ashâb-ı hayrâtdan merhûm Kör Ali Ağa nâm sâhibü’l-hayrın mahalle-i merkūmede vâki‘ menzili altında tarîk-i âmda binâ ve vakıf eylediği çeşmesinin bi’l-fi‘il mütevelliyesi işbu bâ‘isetü’l-kitâb Âişe bt. el-Hâc Himmet nâm hatun meclis-i ma‘kūd-ı mezkûrda merhûme Rahime Hatun bt. Abdullah nâm sâhibetü’l-hayrın mahalle-i mezbûrede vâki‘ vakıf eylediği hamamın mütevellîsi el-Hâc Mehmed b. Salih nâm kimesne mahzarında bi’t-tevliye üzerine da‘vâ ve takrîr-i kelâm edip merhûm-ı mezkûr Ali Ağa hayâtında Havâss-ı Aliyye kazâsı muzâfâtından Terkos nâhiyesine tâbi‘ Ortabelgrad nâm mevzi‘de kendi mâlıyla âbâr-ı müte‘addide hafr ettirip cem‘ ve tahsîl ve kanavât-ı müsennât ile ihrâz ve icrâ eylediği miyâhdan zikr olunan çeşmesine bir masura su vakıf ve şart ve ta‘yîn ve bin altmış dört senesi Cumâdelâhire’sinin [79b] yedinci günü târihiyle müverrah hüccet ettirip ol târihden beri merhûm-ı mezkûrun ta‘yîn eylediği bir masura çeşme-i mezbûrda cereyân eder iken mütevellî-i merkūm el-Hâc Mehmed bi-gayr-ı hakkın kat‘ ve hamam-ı mezkûra icrâ ettirip vakf-ı mezbûra gadretmekle suâl olunup çeşme-i mezkûrenin bir masura suyu ke’l-evvel icrâ ettirilmek bi’t-tevliye matlûbumdur dedikde gıbbe’s-suâl ve’l-inkâr müdde‘iye-i mezbûreden takrîr-i meşrûhuna mutâbık beyyine taleb olundukda udûl-i ahrâr-ı ricâl-i Müslimînden çeşme-i mezkûreden intifâ‘ları olmayan kimesnelerden es-Seyyid Musa Ağa b. Mustafa ve Ali Ağa b. Mustafa ve Eyüb Çelebi b. el-Hâc Mehmed ve Abdullah Çelebi b. Veli ve Mehmed Çelebi b. Mustafa ve Süleyman Çelebi b. Abdullah nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka merhûm-ı mezkûr Kör Ali Ağa b. Ahmed b. Abdullah hâl-i hayâtında kendi mâlıyla Havâss-ı Aliyye kazâsı muzâfâtından Terkos nâhiyesinde Ortabelgrad nâm mevzi‘de âbâr-ı müte‘addide hafr ettidirip cem‘ ve tahsîl eylediği miyâhdan kanavât-ı müsennât ile ihrâz ve icrâ ve mahalle-i mezkûrda vâki‘ menzili tahtında tarîk-i âm üzerinde binâ eylediği çeşmesine bir masura su vakıf ve şart ve ta‘yîn eyleyip bu ana gelince çeşme-i mezkûrede merhûm-ı mezkûrun ta‘yîni üzere cereyân eder iken mütevellî-i mezbûr el-Hâc Mehmed bi-gayr-ı hakkın kat‘ ve hamam-ı mezkûra icrâ eylemişdir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mûcebiyle münâza‘un-fîh olan bir masura sudan kasr-ı yed ve çeşme-i mezkûra cereyân ettirmek üzere mütevellî-i merkūm el-Hâc Mehmed’e tenbîh eylediğini mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr Mehmed Beşe ve Hüseyin ile meclis-i şer‘a gelip inhâ ve takrîr etmeğin ba‘de’t-tenfîz mâ-vaka‘a bi’t-taleb ketb olundu. Fî 20 min-Cumâdelûlâ sene 1121 Şuhûdü’l-hâl: Es-Seyyid İsmail Efendi el-Müderris, Abdullah Ağa b. İsmail Paşa, Molla Mehmed b. Ali, Mahmud Çelebi b. Osman, Mehmed Çelebi b. Mahmud, Ömer Çelebi b. Osman, Mustafa Çelebi b. Ömer, Bıçakçı Mehmed Çelebi, Ali Çelebi b. Mehmed, Mehmed Çelebi b. Ali, Hasan Beşe b. İbrahim, Osman Beşe b. İbrahim, Mustafa Beşe b. İbrahim, Ahmed Efendi b. Ali ve gayruhum mine’l-huzzâr.