Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 489 Hüküm no: 552 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hacı Hasan’ın boşandığı kocası Süleyman Beşe b. Abdullah’dan mehir bedeline karşılık çeşitli ev eşyaları alarak zimmetini ibra ettiği Mahmiye-i İstanbul’da Keçeci Pîrî Mahallesiʼnde sâkine olup zâtı Derviş Çelebi b. Selim ve Mehmed Beşe b. Ali nâm kimesneler ta‘rîfleriyle mu‘arrefe olan Âişe bt. el-Hâc Hasan nâm hatun mahfil-i kazâda zevc-i sâbıkı işbu râfi‘u’l-kitâb Süleyman Beşe b. Abdullah nâm kimesne mahzarında ikrâr ve takrîr-i kelâm edip mezbûr Süleyman bundan akdem zevcim olup beni bâyinen tatlîk etmekle zimmetinde mütekarrer ve ma‘kūdün-aleyh olan üç bin yüz akçe mehr-i müeccelimi mezbûr Süleyman’dan taleb ve da‘vâ eylediğimde mezbûr Süleyman dahi ber-vech-i muharrer meblağ-ı mezbûr üç bin yüz akçe zimmetinde bana deyni olduğunu ikrâr u i‘tirâf eylediğinden sonra mezbûr Süleyman eşyâ-i memlûkesinden mecmû‘u üç bin yüz akçe kıymetli bir kapaklı tencere ve bir leğen ve bir tâbe ve iki yorgan ve bir çârşeb ve bir kırmızı velençe ve bir kırmızı ihrâm ve bir yasdık ve bir minder ve iki kapı perdesi ve iki keyl pirinç ve bir buçuk keyl buğdayı bana def‘ ü teslîm ben dahi yedinden ahz u kabz edip hukūk-ı zevciyete ve târih-i kitâba gelince beynimizde cereyân eden ahz u i‘tâ ve hukūk-ı ma‘lûme ve mechûleye müte‘allika âmme-i da‘vâdan mezbûr Süleyman’ın zimmetini ibrâ ve iskāt eyledim fîmâ-ba‘d kat‘â da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-Şa‘bâni’l-mu‘azzam sene 1121 Şuhûdü’l-hâl: İmâm Hasan Efendi b. Ali, Ali Odabaşı b. Ahmed, Ali Çelebi b. Mehmed, Receb Beşe b. Ahmed, Ahmed Efendi b. Osman ve gayruhum mine’l-huzzâr.