Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 490 Hüküm no: 553 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hacı Hasan’ın talebiyle boşandığı kocası Süleyman Beşe b. Abdullah’ın ödemesi şartıyla çocukları Fâtıma ve Ali’ye nafaka takdir edildiği Mahmiye-i İstanbul’da Keçeci Pîrî Mahallesiʼnde sâkine olup zâtı Derviş b. Selim ve Mehmed Beşe b. Ali nâm kimesneler ta‘rîfleriyle mu‘arrefe olan Âişe bt. el-Hâc Hasan nâm hatun meclis-i şer‘-i şerîf-i lâzımü’t-tevkīrde zevc-i sâbıkı Süleyman b. Abdullah nâm kimesne mahzarında takrîr-i kelâm ve tâʻbir ani’l-merâm edip mezbûrun firâşından hâsıl ve benden mütevellid işbu Ali ve Fâtıma nâm sagīrler hâlâ bi-hakkı’l-hıdâne hacr u terbiyemde olup nafaka ve kisveye eşedd-i ihtiyâc ile muhtâc olmağın hâlâ kıbel-i şer‘den babaları mezbûr Süleyman üzerine sagīrân-ı mezbûrân Ali ve Fâtıma için kadr-i kifâye nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi târih-i kitâbdan babaları üzerine bi’t-terâzî beher yevm her birine dörder akçe nafaka ve kisve-bahâ farz ve takdîr <> edip meblağ-ı mefrûz-ı mezkûru sagīrân-ı mezbûrân Ali ve Fâtıma’nın nafaka ve kisve ve sâir levâzım-ı zarûriyyelerine harc u sarfa ve lede’l-iktizâ istidâneye ve inde’z-zafer mezbûr Süleyman üzerine rücû‘a mezbûre Âişe’ye izin vermeğin mâ-vaka‘a bi’t-taleb ketb olundu. Fî 6 min-Şa‘bâni’l-mu‘azzam sene 1121 Şuhûdü’l-hâl: Es-sâbikūn, es-sâbikūn, es-sâbikūn.