Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 490 Hüküm no: 554 Orijinal metin no: [79b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mahmud’un boşandığı kocası Seyyid Mehmed Çelebi b. İsmail’deki mehir ve nafaka bedeline karşılık bazı giyecek eşyası alarak zimmetini ibra ettiği Mahmiye-i İstanbul’da Cevvîzâde Mahallesi sâkinelerinden olup zâtı ta‘rîf-i şer‘î ile mu‘arrefe olan Fâtıma bt. Mahmud nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb es-Seyyid Mehmed Çelebi b. İsmail nâm kimesne mahzarında ikrâr ve takrîr-i kelâm edip mezbûr es-Seyyid Mehmed zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan iki bin beş yüz akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr es-Seyyid Mehmed Çelebi ile muhâla‘a-i sahîha-i şer‘iyye ile muhâla‘a olduğumda ol dahi vech-i meşrûh üzere hul‘-ı mezkûru kabûl ettiğinden sonra zevcim mezbûr es-Seyyid Mehmed Çelebi eşyâ-i memlûkesinden iki yüz aded tütün çubuğu ve bir neftî çukaya kaplı nâfe kürk ve bir laciverdî çuka kontuş ve bir çuka dolamasını yüz yetmiş guruşa safka-i vâhide ile bana bey‘ ve teslîm ben dahi ber-vech-i muharrer iştirâ ve kabz eylediğimden sonra semeni olan meblağ-ı mezbûr yüz yetmiş guruşa takās edip ben dahi mukāssa ve kabûl eylediğimden sonra hukūk-ı zevciyete ve meblağ-ı mezbûra müte‘allika olan âmme-i da‘vâdan her birimiz âharın zimmetini ibrâ ve iskāt eyledik baʻde’l-yevm birbirimiz ile da‘vâ ve nizâ‘ımız kalmadı dedikde gıbbe’t-tasdîkı’ş-şer‘î <> mâ-hüve’l-vâki‘ bi’t-taleb ketb olundu. Fî 4 min-Şa‘bâni’l-mu‘azzam sene 1121 Şuhûdü’l-hâl: Hüseyin Çavuş el-Mübâşir, Mehmed Çelebi b. Hasan, Osman b. el-Hâc Mustafa, Mehmed Çelebi b. Abdi ve gayruhum mine’l-huzzâr.