Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 491 Hüküm no: 555 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebe Rukiye bt. Mustafa Efendi’nin vasiyet edip Mustafa Çelebi b. Mehmed’i de vasi tayin ettiği Mahmiye-i İstanbul’da Debbâğ Yunus Mahallesi sâkinelerinden olup zâtı ma‘rifet-i şer‘iyye ile ârifân olan Mehmed Efendi b. Abdullah ve Mustafa Efendi b. Sâdık nâm kimesneler ta‘rîfleriyle mu‘arrefe olan Kābile Rukiye bt. Mustafa Efendi nâm hatun meclis-i şer‘-i şerîf-i enverde zikri âtî vesâyâsını tenfîze vasiyy-i muhtâr nasb ve ihtiyâr eylediği Mustafa Çelebi b. Mehmed muvâcehesinde ikrâr ve takrîr-i kelâm edip bi-emri’llâhi te‘âlâ vefât eylediğimde mezkûr Mustafa Çelebi vasiyy-i muhtârım olup eşyâ-i memlûkemden bir zümrüd küpe ve yirmi bir miskāl altından masnû‘ bir çift bilezik ve bir altın hatem ve bir inci kuşak ve sâir kalîl ü kesîr ve celîl ü hakīr cemî‘ terekemi kabz ve sûk-ı sultânîde baʻde’l-bey‘ sülüsünü ifrâz ve sülüs-i mezkûrdan kifâyet mikdârı techîz ve tekfîn ve levâzım-ı defnim ve iskāt-ı salâtım edip bâkī kalan sülüsden eyyâm-ı mübârekede tabh-ı ta‘âm ve it‘âm-ı fukarâ eylediğinden sonra eğer sülüs-i mezkûrdan bâkī bir şey kalır ise kendi dilediği gibi vücûh-ı birre harc u sarf edip mâ‘adâ mâlımı vâris-i ma‘rûfum olmamağla mezkûr Mustafa keyfe mâ yeşâ ve yehtâr mutasarrıf olsun deyü vasiyet edip ve bu vasiyyetini tenfîze mezkûr Mustafa Çelebi’yi vasiyy-i muhtâr nasb ve ihtiyâr eyledim dedikde ol dahi vesâyet-i mezkûreyi kabûl ve merâsimini edâya ta‘ahhüd ve iltizâm etmeğin işbu vesîka bi’t-taleb ketb olundu. Fî 6 min-Şa‘bâni’l-mu‘azzam sene 1121 Şuhûdü’l-hâl: Ahmed Efendi b. Mahmud el-İmâm, Mehmed Efendi Halîfe-i Mekteb-i Selîmî, Bekçi Mahmud b. Mehmed, İsmail Çelebi b. Mustafa, Mehmed Efendi b. Abdullah, Mustafa Efendi b. Sâdık, Mustafa b. Şa‘ban.