Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 492 Hüküm no: 557 Orijinal metin no: [80a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yani v. Siro’nun bazı eşya ve malzemelerini Yani v. Nikola’ya sattığı Bakkāl tâifesinden Yani v. Siro nâm zimmî meclis-i şer‘-i şerîf-i enverde işbu râfi‘u’s-sifr diğer Yani v. Nikola nâm zimmî muvâcehesinde ikrâr ve takrîr-i kelâm edip mahmiye-i İstanbul’da Hasır İskelesi’nde vâki‘ İbrahim Ağa mahzeni demekle ma‘rûf mahzen taht-ı icâremde olmağla mahzen-i mezbûr içinde mevcûde olan eşyâ-i memlûkemden bir kebîr kazgan ve bir tencere ve beş sagīr ve kebîr kantar ve bir takım terâzi ve on dört fıçı ve yirmi Kuşada destisi ve yirmi kavanos ve üç yağ medresi ve beş köhne kebe ve bir Mısır hasırı ve üç yüz kırk sekiz vakıyye asel ve yüz kırk dört vakıyye revgan-ı sâde ve altı vakıyye şîrugan ve yirmi iki vakıyye yağ mumu ve seksen vakıyye bulgur ve yüz elli vakıyye sirke ve sâir beynimizde ma‘lûm bakkal âlâtımı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile târih-i kitâb şehr-i Rebî‘ülâhir’inin on altıncı günü mezbûr diğer Yani zimmîye yüz yetmiş guruşa bey‘ ve teslîm ol dahi vech-i muharrer üzere iştirâ ve tesellüm ve temellük ve kabz ve kabûl eylediğinden sonra semeni olan meblağ-ı mezbûru târih-i mezbûrda merkūm diğer Yani yedinden tamamen ahz u kabz etmişidim baʻde’l-yevm eşyâ-i muharrere-i mezbûre müşteri-i mezbûr diğer Yani’nin mülk-i müşterâsı ve hakk-ı sırfı olup benim kat‘â alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-Şa‘bâni’l-mu‘azzam sene 1121 Şuhûdü’l-hâl: Pazarbaşı el-Hâc Hüseyin, Bölükbaşı el-Hâc Osman, Davud Bölükbaşı, İsmail Çelebi, Mustafa Ağa Bakkal, Mehmed b. Ahmed, Mustafa b. Ahmed, Mustafa Çelebi b. Şa‘ban, Hasan Çelebi b. Mustafa ve gayruhum mine’l-huzzâr. Nikola Romon, Panayot Delani, Yamandi Kubarcı, Yani v. Panayot, Hristodolo v. Panayot, Kostantin Kubarcı, İstemat v. Nikola.