Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 500 Hüküm no: 563 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Ahmed ile kız kardeşi Sâliha’nın Çelebioğlu Mahallesi’nde ortak oldukları evi nöbetleşe kullanacakları Mahmiye-i İstanbul’da Çelebioğlu Mahallesi sükkânından Mehmed Çelebi b. Ahmed nâm kimesne meclis-i şer‘-i şerîf-i enverde li-ebeveyn kız karındaşı Sâliha’nın zevci ve tarafından husûs-ı âti’l-beyâna vekîl olduğu nehc-i şer‘î ve tarîk-i mer‘î üzere şer‘an sâbit olan Mehmed Bey b. Abdurrahman nâm kimesne muvâcehesinde takrîr-i kelâm ve bast-ı merâm edip ashâb-ı hayrâtdan merhûm Koca Mustafa Paşa Vakfı müstagallâtından olup mahalle-i mezkûrede vâki‘ ma‘lûmü’l-hudûd hâriciye ve dâhiliyede büyût-ı adîdeyi müştemil menzilin üç hisseden bir hissesi benim ve iki hissesi kız karındaşım müvekkile-i mezkûrenin taht-ı tasarrufumuzda olup menzil-i mezkûr vakıf olmağla mütevellî-i vakf-ı mezbûr taksîme izin vermediğinden gayrı hisselerimiz mikdârı taksîme benim dahi rızâm olmayıp ve muhâye’e-i mekâniye mümkün olmamağla muhâye’e-i zamâniye ile her birimiz hisse mikdârı sâkin olmak lâzım gelmeğin her bir senede dört ay ben ve sekiz ay karındaşım müvekkile-i mezkûre sâkine olmak üzere vekîl-i mezkûr ile kavl ü ittifâk edip lâkin evvelen ve sâniyen sâkin olmakda beynimizde ihtilâf olunmağın şer‘an kur‘a olundukda evvelen sâkin olmak mezkûr Mehmed Çelebi’nin kur‘asında zuhûr edip târih-i kitâbdan dört ay tamamına değin mezkûr Mehmed Çelebi sâkin olup ba‘dehû mezkûr Mehmed Çelebi menzil-i mezkûrdan hurûc ve sekiz ay müvekkile-i mezkûre Sâliha sâkine olmak üzere tarafeynden her birine tenbîh olunmağın mâ-vaka‘a bi’t-taleb ketb olundu. Fî 8 min-Şa‘bâni’l-mu‘azzam sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Hüseyin Çelebi b. Hasan, Hasan b. Mustafa, Osman b. Hasan ve gayruhum mine’l-huzzâr.