Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 501 Hüküm no: 564 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Latife Hatun bt. Abdullah’ın mehir bedeli talebiyle boşandığı kocası İsmail b. Mehmed’e açtığı davanın reddedildiği Mahmiye-i İstanbul’da Müftî Hamamı kurbünde Altıpoğaça Mahallesiʼnde sâkine olup zâtı ma‘rifet-i şer‘iyye ile ârifân Mehmed b. Ahmed ve İmâm Mehmed Efendi b. Abdullah nâm kimesneler ta‘rîfleriyle mu‘arrefe olan Latif Hatun bt. Abdullah meclis-i şer‘-i şerîf-i enverde zevc-i sâbıkı işbu râfi‘u’l-kitâb İsmail b. Mehmed nâm kimesne mahzarında üzerine da‘vâ ve takrîr-i kelâm edip bundan akdem ben mezbûr İsmail’in zevcesi olup beni bâyinen tatlîk etmekle mezbûr İsmail zimmetinde mütekarrer ve ma‘kūdün-aleyh olan on üç guruş mehr-i müeccelimi taleb ederim suâl olunup alıverilmesi matlûbumdur dedikde gıbbe’s-suâl mezbûr İsmail cevâbında müdde‘iye-i mezbûre Latif benim zevcim iken mehr-i müecceli olan meblağ-ı mezbûr on üç guruş mehr-i müecceli ve nafaka-i iddeti üzerlerine benimle hul‘ olup ben dahi hul‘-ı mezbûru kabûl etmeğin ol vechile mehr-i mezbûrdan zimmetim berî olmuşdur deyücek gıbbe’l-istintak müdde‘iye-i mezbûre ber-vech-i muharrer hul‘-ı mezbûru ikrâr u i‘tirâf etmekle alâ-mûcebi i‘tirâfihâ müdde‘iye-i mezbûre bî-vech mu‘ârazadan men‘-birle mâ-vaka‘a bi’t-taleb ketb olundu. Fî 10 min-Şa‘bâni’l-mu‘azzam sene 1121 Şuhûdü’l-hâl: İmâm Mehmed b. Abdullah, Müezzin Salih Çelebi b. Abdullah, Mustafa Ağa b. Ahmed, Mehmed Ağa b. Mustafa, Mustafa b. Şa‘ban, Abdullah b. Abdullah, Ali b. İvaz ve gayruhum mine’l-huzzâr.