Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 502 Hüküm no: 565 Orijinal metin no: [82b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Hasan Çelebi’nin boşandığı kocası Mustafa’nın ödemesi şartıyla küçük çocukları İsmail’in ihtiyaçları için nafaka tayin edildiği Mahmiye-i İstanbul’da Neslişah Mahallesiʼnde sâkine işbu bâ‘isetü’l-vesîka Hatice’nin babası ve tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân Mustafa b. Şa‘ban ve Ali b. İvaz şehâdetleriyle şer‘an sâbit olan Hasan Çelebi b. Mehmed nâm kimesne meclis-i şer‘-i şerîf-i enverde takrîr-i kelâm ve tâʻbir ani’l-merâm edip müvekkilem mezbûrenin zevc-i sâbıkı gāib ani’l-meclis Mustafa’nın firâşından hâsıl ve müvekkilem mezbûreden mütevellid bi-hakkı’l-hıdâne hâlâ hacr u terbiyesinde olan sadrî sagīr oğlum İsmail’in nafaka ve kisveye ihtiyâcı olmağla babası gāib-i mezbûr Mustafa üzerine kıbel-i şer‘den kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâlâ [hâl] bâlâda tahrîr olunduğu vech üzere olduğu lede’ş-şer‘ zâhir ve mütehakkık oldukdan sonra hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīr-i mezbûr İsmail’in nafaka ve kisve-bahâsıʼçün babası gāib-i mezbûr Mustafa üzerine târih-i kitâbdan beher yevm ikişer [akçe] nafaka ve kisve-bahâ farz ve takdîr edip meblağ-ı mefrûz-ı mezbûru sagīr-i mezbûrun nafaka ve kisve ve sâir levâzım-ı zarûriyyesine harc u sarfa ve lede’l-iktizâ istidâneye ve inde’z-zafer babası gāib-i mezbûr Mustafa üzerine rücû‘a müvekkile-i mezbûreye izin vermeğin mâ-vaka‘a bi’t-taleb ketb olundu. Fî 10 min-Şa‘bâni’l-mu‘azzam sene 1121 Şuhûdü’l-hâl: Mustafa Çelebi b. Şa‘ban, Hasan b. Mustafa, Ali b. İvaz, Abdülkerim b. Ahmed, Mehmed b. Ahmed, Ahmed b. Osman ve gayruhum mine’l-huzzâr.