Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 502 Hüküm no: 566 Orijinal metin no: [82b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belkıs bt. Abdullah’ın bakımını üstlendiği torunu Hatice’nin ihtiyaçları için babası Hacı Resul b. Osman’ın ödemesi şartıyla nafaka tayin edildiği Medîne-i Havâss-ı Refî‘a’da vâki‘ Lokmacızâde Mahallesiʼnde sâkine olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Belkıs bt. Abdullah nâm hatun meclis-i şer‘-i şerîf-i enverde el-Hâc Resul b. Osman nâm kimesne mahzarında takrîr-i kelâm ve tâʻbir ani’l-merâm edip mezbûr el-Hâc Resul bundan akdem kızım Fâtıma bt. Yusuf’un zevc-i sâbıkı olup mezbûr el-Hâc Resul’ün firâşından hâsıl ve zevce-i mutallakası kızım Fâtıma’dan mütevvellide bi-hakkı’l-hıdâne hâlâ hacr u terbiyemde olan işbu sagīre Hadice’nin nafaka ve kisveye zarûret ve ihtiyâcı olmağla babası mezbûr el-Hâc Resul üzerine kadr-i kifâye nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīre-i mezbûre Hadice’nin nafaka ve kisvesiʼçün babası mezbûr el-Hâc Resul üzerine bi’t-terâzî târih-i kitâbdan beher yevm beşer akçe nafaka ve kisve-bahâ farz ve takdîr edip meblağ-ı mefrûz-ı mezbûru sagīre-i mezbûrenin levâzımına harc u sarfa ve lede’l-iktizâ istidâneye ve inde’z-zafer mezbûr el-Hâc Resul üzerine rücû‘a mezbûre Belkıs’a kıbel-i şer‘den izin verilmeğin mâ-vaka‘a bi’t-taleb ketb olundu. Fî 9 min-Şa‘bâni’l-mu‘azzam sene 1121 Şuhûdü’l-hâl: Mustafa Çelebi b. Şa‘ban, Mehmed Ağa b. Abdullah Kethüdâ-yı muhzırân, Ali b. İvaz, Abdullah b. Abdullah, Ali b. Bâli, Hasan b. Mustafa ve gayruhum mine’l-huzzâr.