Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 503 Hüküm no: 567 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Ömer Çelebi b. Hacı Hüseyin’in vefât eden Yanaki v. Rado’da olan alacağını kefili olan annesi Vasilaki bt. Vasil’den sulh yoluyla tahsil ettiği Mahmiye-i İstanbul’da Hüseyin Efendi Hanı’nda müsâfiren sâkin tüccâr tâifesinden Ömer Çelebi b. el-Hâc Hüseyin nâm kimesne meclis-i şer‘-i şerîf-i enverde işbu râfi‘u’s-sifr Vasilaki bt. Vasil nâm Nasrâniye tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân Ahmed b. Hüseyin ve Hüseyin b. Mustafa şehâdetleriyle şer‘an sâbit olan İstamo v. Horsamolo nâm zimmî muvâcehesinde ikrâr ve takrîr-i kelâm edip müvekkile-i mezbûre Vasilaki’nin oğlu olup bundan akdem hâlik olan Yanaki v. Rado zimmetinde hâlik-i mezbûrun yedimden iştirâ ve kabz eylediği beynimizde ma‘lûm sahtiyân bahâsından otuz guruş bir rub‘ guruş hakkım olup meblağ-ı mezbûra bi’l-emr ve’l-kabûl kefâlet-i sahîha ile müvekkile-i mezbûre Vasilaki kefîl olmağla meblağ-ı mezbûru kefâletine binâen müvekkile-i mezbûr[e]den taleb ve da‘vâ edip ol dahi inkâr etmeğin beynimizde nizâ‘-ı küllî cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden müvekkile-i mezbûre Vasilaki benimle an-inkârin on altı guruş bir rub‘ guruş üzerine sulh olduğunda ben dahi sulh-ı mezbûru baʻde’l-kabûl bedel-i sulh olan meblağ-ı mezbûr on altı guruş ve bir rub‘ guruşu müvekkile-i mezbûre bana def‘ ü teslîm ben dahi yedinden ahz u kabz edip meblağ-ı bâkī-i mezbûr on dört guruş mutâlebesinden müvekkile-i mezbûrenin zimmetini ibrâ-i âm ile ibrâ ve iskāt eyledim baʻde’l-yevm müvekkile-i mezbûre ile husûs-ı mezbûra müte‘allik da‘vâ ve nizâ‘ım kalmadı dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 5 min-Şa‘bâni’l-mu‘azzam sene 1121 Şuhûdü’l-hâl: Ahmed b. Hüseyin, İbrahim b. Mustafa, İsa b. Ahmed, Mehmed Yazıcı b. Mehmed, Hüseyin b. Mustafa, Ebûbekir Çelebi Berber, Mustafa b. Şa‘ban, Ali Çelebi b. İvaz, Hasan b. Mustafa ve gayruhum mine’l-huzzâr.