Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 504 Hüküm no: 568 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ali’nin Tüccar Süleyman Çelebi b. Mustafa’ya olan birikmiş taksitlerini ödemesi ve kalan borcunu da zamanında ödemesine yapılan tenbih Keresteci tâifesinden işbu râfi‘u’l-kitâb Süleyman Çelebi b. Mustafa nâm kimesne mahfil-i kazâda Mehmed b. Ali nâm kimesne mahzarında üzerine da‘vâ ve takrîr-i kelâm edip mezbûr Mehmed yedimden iştirâ eylediği cins ve adedi beynimizde ma‘lûm kereste bahâsından on altı bin akçe hakkımı hâlâ ve def‘aten edâya iktidârı olmamağla işbu yedimde olup hat ve hatemini hâvî temessük mantûku üzere târih-i kitâb senesi gurre-i Saferi’l-hayr’ın ibtidâsından her otuz günde bana on beşer guruş vermek üzere te’cîl ve taksît eylediğimde ol dahi baʻde’l-kabûl ber-vech-i muharrer meblağ-ı mezbûru mukassaten edâya ta‘ahhüd eylemişidi hâlâ gurre-i Şa‘bân’a gelince altı ayda doksan guruş müctemi‘ olmağın suâl olunup meblağ-ı mezbûrdan ber-vech-i muharrer müctemi‘ olan doksan guruşu bana edâya tenbîh olunmak matlûbumdur dedikde gıbbe’s-suâl mezbûr Mehmed cevâbında hâlâ [hâl] minvâl-i muharrer üzere olup meblağ-ı mezbûr on altı bin akçeden müctemi‘ gurre-i Şa‘bân’a gelince doksan guruş müdde‘î-i mezbûra deyni olduğunu ikrâr u i‘tirâf etmeğin alâ-mûcebi i‘tirâfihî meblağ-ı mezkûr doksan guruşu hâlâ ve bâkīsi olan meblağı mukassaten müdde‘î-i mezbûra edâya mezbûr Mehmed’e tenbîh-birle mâ-vaka‘a bi’t-taleb ketb olundu. Fî 6 min-Şa‘bâni’l-mu‘azzam sene 1121 Şuhûdü’l-hâl: Mustafa b. Şa‘ban, Ali b. İvaz, Hasan b. Mustafa, Ali b. Bâli, Süleyman b. Abdullah ve gayruhum mine’l-huzzâr.