Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 504 Hüküm no: 569 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nazar v. Karaman’ın vârislerinden Mustafa’nın terekeden olan menzildeki hissesini kardeşleri Karaman ve Tursun’a sattığı Mahmiye-i İstanbul’da Ali Paşa sûkunda vâki‘ ekmekçi fırınında hâlik olan Nazar v. Karaman nâm zimmînin verâseti zevce-i metrûkesi Hohi bt. Kazar ile sulbî oğlu olup hîn-i helâkinde zimmî ve hâlâ Müslim olan Mustafa nâm mühtedî ile âhar oğulları Toros ve Karaman nâm zimmîler ile sulbiye kızları Maryem ve Serpodane? ve İranihi ve Agode ve Nazlı ve Melek nâm Nasrâniyelere münhasıra ve tashîh-i mes’elesi yüz dört sehmden olup sihâm-ı mezbûreden on üç sehmi zevcesi mezbûre Hohi’ye ve on dörder sehmi oğulları mezbûrûndan her birine ve yedişer sehmi kızları mezbûrâtdan her birine isâbeti tahakkukundan sonra mezbûr Mustafa meclis-i şer‘-i şerîf-i enverde karındaşı mezbûr Karaman tarafından husûs-ı âti’z-zikri tasdîka vekîl olduğu nehc-i şer‘î üzere sâbit olan Avanos v. Begos nâm zimmî ile âhar karındaşı merkūm Toros muvâcehelerinde ikrâr ve takrîr-i kelâm edip gāibân ani’l-meclis mezbûrât Maryem ve Serpodane? mûrisimiz hâlik-i mezbûrun terekesinden olup Eğin kazâsına tâbi‘ İçka? nâm karyede vâki‘ lede’l-ahâlî ve’l-cîrân ma‘lûmü’l-hudûd mülk menzil ve yine karye-i mezbûrede vâki‘ kezâlik ma‘lûmü’l-hudûd üç kıt‘a bağ ve menzil-i mezbûrda mevcûd seksen vakıyye bakır ve on yorgan ve altı kebe ve sekiz velençe ve yirmi yasdık ve sâir eşyâ-i ma‘lûmeden tashîh-i mezbûr üzere yedişer sehmden yirmi bir sehm-i şâyi‘alarını bundan akdem semen-i ma‘lûma bana bey‘ edip ol vechile emlâk-ı mezbûrenin yüz dört sehmden yirmi bir sehmi şirâen ve on dört sehmi dahi irsen mülküm olmağla hâlâ emlâk-ı mezbûrede irsen ve şirâen hissem olan otuz beş sehm-i şâyi‘i tarafeynden îcâb ve kabûlü hâvî bey‘-i kat‘î ile mezbûr Toros ile müvekkil-i mezbûr Karaman’a iki yüz on guruşa bey‘ ve temlîk eylediğimde onlar dahi iştirâken iştirâ ve kabûl ve semen-i mezbûru bana teslîm edip ben dahi baʻde’l-kabz husûs-ı mezbûra müte‘allika âmme-i de‘âvîden zimmetlerini ibrâ-i âmm-ı kātı‘u’n-nizâ‘la ibrâ ve iskāt eyledim dedikde gıbbe’t-tasdîkı’l-vicâhî mâ-vaka‘a bi’t-taleb ketb olundu. Fî 29 min-Recebi’l-mürecceb sene 1121 Şuhûdü’l-hâl: Osman Ağa b. İbrahim, Ömer Çelebi b. el-Hâc Osman, Ebûbekir b. Abdullah, Mustafa Bey b. Hüdaverdi, Mustafa Çelebi b. Şa‘ban, Mehmed Çelebi b. Ebûbekir, el-Hâc Ali b. Mahmud, Ebûbekir Ağa b. İbrahim, Ali b. İvaz ve gayruhum mine’l-huzzâr.