Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 505 Hüküm no: 570 Orijinal metin no: [83a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgaki v. Yanaki’nin evini Ayvat v. Hristo’ya istiğlal suretiyle satıp tekrar kiraladığı Mahmiye-i İstanbul’da Tevkī‘î Ca‘fer Çelebi Mahallesiʼnde sâkin Yorgaki v. Yanaki nâm zimmî meclis-i şer‘-i şerîf-i enverde bâ‘isü’s-sifr Ayvat v. Hristo nâm zimmî muvâcehesinde ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan merhûm Kadri Efendi Vakfı’ndan olan menzil ve iki tarafdan Anaştaş zimmî mülkü ve bir tarafdan tarîk-i âm ile mahdûd iki bâb fevkānî ve bir bâb tahtânî odaları müştemil menzilimi mezbûr Ayvat zimmîye bi-tarîkı’l-istiğlâl iki yüz on guruşa [83b] bey‘ ve teslîm eylediğimde ol dahi ber-vech-i muharrer iştirâ ve tesellüm ve kabûl ve semen-i mezbûru tamamen bana def‘ ü teslîm ben dahi yedinden ahz u kabz eylediğimden sonra merkūm Ayvat zimmî yine menzil-i mahdûd-ı mezbûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamamına değin otuz guruşa bana îcâr ve teslîm edip ben dahi istîcâr ve tesellüm eyledim dedikde gıbbe’t-tasdîkı’l-vicâhî merkūm Yorgaki yine meclis-i şer‘de Fotaki v. İskoli muvâcehesinde takrîr-i kelâm edip asl-ı mâl-ı mezbûr iki yüz on guruş ile ücret-i mezbûre otuz guruş ki cem‘an iki yüz kırk guruşu müddet-i mezbûre tamamında edâ edemez isem menzil-i mezbûru semen-i misliyle âhara bey‘a ve semeninden deyn-i mezbûru edâ ve fazla kalır ise bana îsâle küllemâ azeltüke fe-ente vekîlî mazmûnu mefhûmunca azl ü in‘izâlden masûne akd-i rehnde meşrûta vekâlet-i devriye ile tarafımdan mezbûr Fotaki’ye vekîl ve nâib-i menâb nasb u ta‘yîn eyledim dedikde ol dahi vekâlet-i mezbûreyi kabûl ve merâsimini edâya ta‘ahhüd etmeğin mâ-vaka‘a bi’t-taleb ketb olundu. Fî-gurreti Şa‘bâni’l-mu‘azzam sene 1121 Şuhûdü’l-hâl: Mustafa Çelebi b. Şa‘ban, Hasan b. Abdullah, Mehmed Çelebi b. Abdi, Ali b. İvaz, Abdullah b. Mustafa, Ali b. Bâli, İbrahim b. ( ) ve gayruhum mine’l-huzzâr.