Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 506 Hüküm no: 571 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lala Osman Ağa b. Abdullah’ın Akşemseddin Mahallesi’ndeki menzildeki iki hissesini Yusuf Efendi b. Mahmud’a sattığı Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘den Mevlânâ Süleyman Efendi b. Receb irsâl olunup ol dahi Mahmiye-i İstanbul’da Akşemseddin Mahallesiʼnde sâkin fahrü’l-a‘yân Lala Osman Ağa b. Abdullah nâm kimesnenin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî eyledikde merkūm Osman Ağa meclis-i ma‘kūd-ı mezbûrda hâfızu hâze’l-kitâb Yusuf Efendi b. Mahmud mahzarında ikrâr-ı tâm ve takrîr-i kelâm edip hâlâ silk-i mülk-i sahîhimde münselik olup akd-i âti’z-zikrin sudûruna değin mahalle-i mezbûrede vâki‘ bir tarafdan Hadice Hatun mülkü ve bir tarafdan Sâ‘atçi İshak mülkü ve bir tarafdan Osman Efendi mülkü ve bir tarafdan tarîk-i âm ile mahdûd hâriciyesinde iki bâb fevkānî oda ve iki sofa ve tahtânî üç bâb oda ve bir kenîf ve ahır ve havlu ve bahçe ve dâhiliyesinde fevkānî üç bâb oda ve bir sofa ve bir kiler ve kenîf ve tahtânî bir kiler ve mahtab ve matbah ve iki kenîf ve bi’r-i mâ ve bahçeyi müştemil mülk menzil dört sehm i‘tibârıyla üç sehmi benim mülk-i müşterâm olup bir sehmi dahi hâlâ zevce-i menkûham Zeyneb nâm hatunun bundan akdem zevci olup vefât eden Hasan Ağa’dan müntakil irsen hisse-i şâyi‘ası olmağla zikri mürûr eden üç sehm-i şâyi‘amın iki sehmini tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile mezbûr Yusuf Efendi’ye dört yüz guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr dört yüz guruş mutâlebesinden merkūm Yusuf Efendi’nin zimmetini ibrâ-i âmm-ı kātı‘u’n-nizâ‘la ibrâ ve iskāt edip baʻde’l-yevm menzil-i mahdûd-ı mezkûrun dört sehm i‘tibârıyla nısfı olan iki sehmi mezbûr Yusuf Efendi’nin mülk-i müşterâsı ve hakk-ı sırfı olmuşdur kat‘â benim alâka ve medhalim kalmayıp keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Receb Beşe b. Abdullah ve Ömer b. Mehmed nâm kimesneler ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 9 min-Şa‘bâni’l-mu‘azzam sene 1121 Şuhûdü’l-hâl: Osman Efendi b. Şa‘ban, Ahmed Çelebi b. İbrahim, Mehmed Beşe b. Mustafa, Eyüb Ağa b. Mehmed, Yusuf b. Abdullah, Süleyman b. Abdullah, Molla Mustafa b. Hüsrev, İbrahim Ağa Duhân-ı gümrük, Ahmed Efendi b. Muharrem, Molla Ahmed b. Abdullah, Ömer Çelebi tâbi‘-i Ahmed Efendi, Receb Çelebi b. Abdullah.