Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 507 Hüküm no: 572 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lala Osman Ağa b. Abdullah’ın Akşemseddin Mahallesi’ndeki menzildeki bir hissesini hanımı Zeyneb bt. Abdullah’a sattığı Kezâlik merkūm Lala Osman Ağa meclis-i ma‘kūd-ı mezbûrda hâlâ zevce-i menkûhası hâfızatü hâzi[hi]’l-kitâb Zeyneb bt. Abdullah nâm hatun mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Hadice Hatun mülkü ve bir tarafdan Sâ‘atçi İshak mülkü ve bir tarafdan Osman Efendi mülkü ve bir tarafdan tarîk-i âm ile mahdûd hâriciyesinde üç bâb fevkānî oda ve iki sofa ve tahtânî üç oda ve kenîf ve ahır ve havlu ve bahçe ve dâhiliyesinde fevkānî üç bâb oda ve bir kiler ve bir sofa ve kenîf ve tahtânî iki kenîf ve bir kiler ve mahtab ve matbah ve bi’r-i mâ ve bir mikdâr bahçeyi müştemil menzilin dört sehm i‘tibârıyla iki sehmi Yusuf Efendi b. Mahmud nâm kimesnenin mülk-i müşterâsı ve bir sehmi dahi mezbûre Zeyneb Hatun’un zevc-i âharı olup müteveffâ Hasan Ağa nâm kimesneden müntakil irsen mülkü olmağla bâkī bir sehm hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem mezbûre Zeyneb’e iki yüz guruşa bey‘ ve temlîk ve teslîm mezbûre Zeyneb dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ iki yüz guruş mutâlebesinden zevcem mezbûre Zeyneb’in zimmetini ibrâ-i âmm-ı kātı‘u’n-nizâ‘la ibrâ ve iskāt eyledim baʻde’l-yevm menzil-i mahdûd-ı mezkûrda sihâm-ı merkūm üzere bir sehm-i şâyi‘amda dahi kat‘â alâka ve medhalim kalmayıp zevcem mezbûre Zeyneb’in mülk-i müşterâsı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Receb Beşe b. Abdullah ve Ömer b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 9 min-Şa‘bâni’l-mu‘azzam sene 1121 Şuhûdü’l-hâl: Es-sâbikūn, es-sâbikūn, es-sâbikūn.