Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 508 Hüküm no: 573 Orijinal metin no: [83b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manol v. İstemat ve Saltana bt. Palolo’nun ortak oldukları Abdi Subaşı Mahallesi’ndeki evdeki hisselerinin ifrazı Husûs-ı âti’l-beyânın mahallinde keşf ve tahrîri için bâ-fermân-ı âlî savb-ı şer‘den Mevlânâ İmâmzâde Mehmed Emin Efendi irsâl olunup ol dahi hâssa mi‘mâr halîfelerinden es-Seyyid Mustafa Halîfe b. Eyüb ve Mustafa Halîfe b. Ahmed ile merhûm el-Hâc ( ) Vakfı’ndan olup mahmiye-i İstanbul’da Fenerkapısı dâhilinde Abdi Subaşı Mahallesiʼnde vâki‘ bir tarafdan Dimitraki zimmî menzili ve bir tarafdan cidâr-ı hısn [84a] ve bir tarafdan sadrâzam hazretlerinin silâhdârları olan ( ) ağa mülkü ve baʻzan tarîk-i hâs ve bir tarafdan tarîk-i âm ile mahdûd olup fevkānî iki bâb oda ve bir matbah ve tahtında iki dükkân ve cidâr-ı hısn tarafında birbirinin üzerinde iki bâb oda ve tahtında mahzen ve tahtında bir harâb oda ve havluyu müştemil menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf et[dik]de menzil-i mezbûra icâre-i mu‘accele-i ma‘lûme ve beher yevm dörder akçe icâre-i müeccele ile ale’l-iştirâki’s-seviyy mutasarrıflar olan Manol v. İstemat nâm zimmî ile Saltana bt. Palolo nâm Nasrâniye meclis-i ma‘kūd-ı mezbûrda her biri takrîr-i kelâm ve bast-ı merâm edip işbu menzil-i mezbûr ale’l-iştirâki’s-seviyy tasarrufumuzda olmağla vakf-ı mezbûr mütevellîsi işbu hâzır bi’l-meclis el-Hâc Ömer Ağa b. Süleyman’ın izin ve ma‘rifetiyle her birimizin münâsafaten hissemiz ta‘yîn olunmak matlûbumuzdur dediklerinde mi‘mârân-ı mezbûrân mesâha eylediklerinde menzil-i mezbûrun mecmû‘ dört yüz altmış yedi zirâ‘ arsası olup tarîk-i âm tarafında olan fevkānî iki bâb oda ve bir matbah ve tahtında iki dükkân ve yetmiş sekiz zirâ‘ arsa-yı hâliye tarîk-i âmma başka sokak kapısı açmak üzere mezbûre Saltana’ya ve cidâr-ı hısn tarafında olan birbirinin üzerinde iki bâb oda ve tahtında mahzen ve bir tahtânî oda ve doksan bir zirâ‘ arsa-yı hâliye ve köhne nerdübân ve sokak kapısı mezbûr Manol zimmîye ta‘yîn ve tahsîs olunup lâkin mezbûre Saltana’ya ta‘yîn olunan mahallin mecmû‘-ı arsası iki yüz yetmiş altı zirâ‘ ve merkūm Manol zimmîye ta‘yîn olunan mahallin dahi mecmû‘-ı arsası yüz doksan bir zirâ‘ olup ol vechile mezbûre Saltana’ya [ta‘yîn olunan] mahallin mecmû‘-ı arsası iki yüz yetmiş altı zirâ‘ ve merkūm Manol zimmîye ta‘yîn olunan mahallin dahi mecmû‘-ı arsası yüz doksan bir zirâ‘ olup ol vechile mezbûre Saltana’ya ta‘yîn olunan mahallin arsası merkūm Manol’un arsasından seksen beş zirâ‘ ziyâde olmağla mezbûre Saltana izdiyâd-ı mezbûr mukābelesinde merkūm Manol’a teberru‘an sekiz bin akçe teslîm edip ol dahi baʻde’l-ahz mütevellî-i mezbûr dahi ber-vech-i muharrer yevmî ikişer akçe icâre-i müeccele her biri hisse-i mu‘ayyenelerin tasarruf etmek üzere bi’t-tevliye izin verdikden sonra mezbûrândan her biri dahi kabûl ve husûs-ı mezbûra müte‘allika âmme-i de‘âvîden birbirlerinin zimmetlerini ibrâ eylediklerini mevlânâ-yı mezbûr mahallinde tahrîr ba‘dehû ma‘an ba‘s olunan el-Hâc Hüseyin b. ( ) ve Abdullah b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 27 min-Recebi’l-ferd sene 1121 Şuhûdü’l-hâl: Mustafa Beşe b. Süleyman, Süleyman Beşe b. Abdullah, Ahmed Beşe b. Ali, Mustafa Çelebi b. Mehmed ve gayruhum mine’l-huzzâr.