Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 509 Hüküm no: 574 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Abdullah’ın geçinemediği kocası Hüseyin Beşe b. Hasan’dan boşandığı Mahmiye-i İstanbul’da Kazasker Mahallesiʼnde sâkine olup zâtı Mustafa Çelebi b. Ahmed ve Ali Beşe b. Ahmed nâm kimesneler ta‘rîfleriyle mu‘arrefe olan Emetullah bt. Abdullah nâm hatun meclis-i şer‘-i şerîfde zevc-i dâhili işbu sâhibü’l-kitâb Hüseyin Beşe b. Hasan mahzarında ikrâr-ı tâm ve takrîr-i kelâm edip zevcim mezbûr Hüseyin Beşe ile beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan üç yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere mezbûr Hüseyin Beşe ile muhâla‘a-i sahîha-i şer‘iyye ile hul‘ olduğumda ol dahi minvâl-i muharrer üzere hul‘-ı mezbûru kabûl eylediğinden sonra hukūk-ı zevciyete müte‘allika cemî‘ de‘âvî ve mutâlebât ve kâffe-i eymân ve muhâsamâtdan mezbûr Hüseyin Beşe’nin zimmetini ibrâ-i âmm-ı kātı‘u’n-nizâ‘la ibrâ ve iskāt eyledim fîmâ-ba‘d husûs-ı mezbûra müte‘allika birbirimiz ile kat‘â da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 11 min-Şa‘bâni’l-mu‘azzam sene 1121 Şuhûdü’l-hâl: Çalık Mehmed b. Ahmed, Hüseyin b. Hasan, Mustafa Çelebi b. Şa‘ban, Monla Osman b. Mustafa, Ali Çelebi b. İvaz ve gayruhum mine’l-huzzâr.