Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 304 Hüküm no: 765 Orijinal metin no: [76b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Buçuk Yorgi b. Yani ile İstefan b. Nikola’nın Ahmed b. Hacı’yı dövdükleri Vech-i tahrîr-i sicil budur ki Nefs-i Üsküdar’dan Ahmed b. Hacı tarafından sâbitü’l-vekâle vekîl olan Kasım b. Ahmed meclis-i şer‘a takrîr-i da‘vâ kılıp dedi ki müvekkilim Ahmed’i karye-i Akkilise’den Buçuk Yorgi b. Yani ve İstefan b. Nikola darb-ı şedîd ile mecrûh edip el-ân mecrûh yatıyor, dedikde mezbûr Buçuk Yorgi gaybet edip Matyos nâm oğlanı ile mezbûr İstefan ihzâr olunup inkâr ile cevâb vericek mecrûh yoldaş Nuh b. İskender beni dahi soyup yanımdan kürdem ile dört altınım aldılar deyû şekvâ ettikde mezbûrân Matyos ile İstefan yedlerinde mezkûr Nuh’un kürdesi bulundukda verip ve dört altının dahi verecek olduklarında mezbûr Matyos’a baban Yorgi’yi bul deyû teklîf olundukda ben babamın vekîliyim, mecrûh Ahmed için melhem bahâ vekîl olan Kasım b. Ahmed’e bin? altın verdim, ibrâ ve ıskāt ettim, min-ba‘d bizden veya müvekkilim babam Yorgi’den da‘vâ sâdır olmasın, dedikde mezbûr vekîl Kasım dahi cümle da‘vâdan ve nizâ‘dan ferâgat [ettim] deyû tarafeynden sâdır olan ikrârları bi-hasebi’ş-şer‘i’ş-şerîf şer‘an mu‘teber görülüp sıhhat-i ibrâ ve iskāt da‘vâ mukarrer olup mâ-hüve’l-vâki‘ bi’t-taleb kayd olundu. Vaka‘a’t-tahrîr fî evâili Cemâziyelâhir sene 963. Şuhûdü’l-hâl: Hızır b. Ahmed, Mustafa b. Mehmed, Ahmed Çelebi b. Hasan, İlyas b. Kara Hüseyin, Hasan b. Abdullah, Ramazan b. Hüseyin ve gayruhüm [77a] Boş [77b] Boş [78a] Boş [78b] Boş [79a] Boş