Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 513 Hüküm no: 580 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa Efendi b. Zeynelâbidin b. İbrahim’in vârislerinden oğlu Salih Efendi’nin terekeden olup Seydîşehir’de bulunan menzil ve bağdaki hissesini Seyyid Mustafa Efendi b. Abdülkerim Efendi’ye sattığı Vilâyet-i Anadolu’da medîne-i Seydîşehri Mahallesi’nden Câmi‘-i Kebîr Mahallesiʼnde sâkin iken bundan akdem vefât eden Musa Efendi b. Zeynelâbidin b. İbrahim’in verâseti zevce-i metrûkesi Kudsiye bt. Derviş Mehmed Efendi ile sulbî kebîr oğulları Zeynelâbidin ve Salih Efendi ve Hüseyin Çelebi’ye ve sulbiye kızı Rukiye’ye münhasıra kable’l-kısme mezbûr Zeynelâbidin dahi fevt olup verâseti vâlidesi mezbûre Kudsiye ile li-ebeveyn er karındaşları mezbûrân Salih Efendi ve Hüseyin Çelebi’ye ve li-ebeveyn kız karındaşı mezbûre Rukiye’ye münhasıra kable’l-kısme mezbûre Rukiye dahi vefât edip verâseti vâlidesi mezbûre Kudsiye ile li-ebeveyn karındaşları mezbûrân Salih Efendi ve Hüseyin Çelebi’ye münhasıra ve tashîh-i mes’ele-i mîrâsları bi-hükmi’l-münâsahati’ş-şer‘iyye yetmiş iki sehmden olup sihâm-ı mezbûreden on dört sehmi mezbûre Kudsiye ve yirmi dokuzar sehmi mezbûrân Salih Efendi ve Hüseyin Çelebi’den her birine isâbet eylediği şer‘an zâhir ve mütehakkık oldukdan sonra mezbûr Salih Efendi meclis-i şer‘-i şerîf-i enverde işbu râfi‘u’l-kitâb umdetü’l-kuzât es-Seyyid Mustafa Efendi b. Abdülkerim Efendi mahzarında ikrâr ve takrîr-i kelâm edip mûrisimiz müteveffâ-i mezbûrun yedinde mülk ve hakkı olup ba‘de vefâtihi bi’l-irsi’ş-şer‘î bize intikāl edip mahalle-i mezbûrede vâki‘ bir tarafdan es-Seyyid el-Hâc Abdülkerim Çelebi mülkü ve bir tarafdan mezbûre Kudsiye mülkü ve bir tarafdan Seyfullah Efendi mülkü ve bir tarafdan tarîk-i âm ile mahdûd bir bâb fevkānî ve tahtânî oda ve bir mikdâr havluyu müştemil mülk menzil ile yine mahalle-i mezbûrede vâki‘ bir tarafdan Seyyid Hârûn-ı Velî Aşhânesi ve bir tarafdan Câmi‘-i Kebîr ve bir tarafdan tarîk-i hâs ve bir tarafdan tarîk-i âm ile mahdûd iki bâb tahtânî oda ve bir samanhâne ve bir ahır ve bir dehlîz ve bir mikdâr harâbe gül bahçesi tâʻbir olunur havluyu müştemil menzil ve yine medîne-i mezbûre hâricinde vâki‘ lede’l-ahâlî ve’l-cîrân ma‘lûmü’l-hudûd bir mikdâr harâbe bahçeden tashîh-i mezkûr üzere bana isâbet eden yirmi dokuz sehm hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile bi-safkatin vâhidetin mezbûr es-Seyyid Mustafa Efendi’ye <> yüz doksan guruşa bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr yüz doksan guruşu mezbûr es-Seyyid Mustafa Efendi yedinden tamamen ahz u kabz edip emlâk-ı mezkûrede olan hisse-i mezbûremi mahallinde zabt u tasarrufa mezbûr es-Seyyid Mustafa Efendi’yi taslît eyledim emlâk-ı <> mezbûrede olan yirmi dokuz sehm-i şâyi‘am mezbûrun mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 min-Şa‘bâni’l-mu‘azzam sene 1121 Şuhûdü’l-hâl: Abdurrahman Efendi b. Ömer, Çelebizâde Ahmed Efendi b. Mehmed Efendi, Molla Mustafa b. el-Hâc Hasan, eş-Şeyh Mustafa Efendi b. Abdülgani, Mustafa b. Şa‘ban, Molla Mustafa b. eş-Şeyh Mahmud Efendi, es-Seyyid Mustafa Efendi b. Abdülkerim, Mehmed Çelebi b. Molla Ahmed, Hüseyin b. Abdullah ve gayruhum mine’l-huzzâr.