Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 515 Hüküm no: 582 Orijinal metin no: [85a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Feyzullah Efendi b. Şa‘ban Efendi’nin evini kendi kurduğu vakfa istiğlal yoluyla satıp tekrar kiraladığı Mahmiye-i İstanbul’da Tercümân Yunus Mahallesiʼnde sâkin muvakkaten Basra kādısı olan fahrü’l-kuzât Feyzullah Efendi b. Şa‘ban Efendi meclis-i şer‘-i şerîf-i enverde kendi nukūd-ı mevkūfesine bi’l-fi‘il mütevelliye olan fahrü’l-muhadderât Safiye Hanım bt. İzzetî Mehmed Efendi’nin dâmadı ve tarafından kāimmakām-ı mütevellî fahrü’l-müderrisîni’l-kirâm işbu râfi‘u’l-kitâb Abdullah Efendi b. Mehmed Reşid Efendi mahzarında ikrâr ve takrîr-i kelâm edip mahalle-i mezbûrede vâki‘ bir tarafdan baʻzan Nihânî Hatun mülkü ve baʻzan tarîk-i âm ve bir tarafdan Hasan Ağa zevcesi atîkalarına meşrûta odalar ve iki tarafdan yine tarîk-i âm ile mahdûd ma‘lûmü’l-müştemilât mülk menzilimi târih-i kitâb senesi Şa‘bâni’l-mu‘azzam’ı gurresinden bi-tarîkı’l-istiğlâl mûmâ-ileyh Abdullah Efendi’ye dört yüz elli beş guruşa bey‘ ve teslîm eylediğimde ol dahi ber-vech-i muharrer yedinde olan mâl-ı vakf-ı mezbûr ile iştirâ ve tesellüm ve kabûl eylediğinden sonra semeni olan meblağ-ı mezbûr dört yüz elli beş guruşu mûmâ-ileyh Abdullah Efendi yedinden tamamen ahz u kabz eylediğimden sonra menzil-i mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i mezbûrdan bir sene tamamına değin yine bana altmış sekiz guruş ve bir rub‘ guruşa îcâr ve teslîm ben dahi istîcâr ve tesellüm eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 min-Şa‘bâni’l-mu‘azzam sene 1121 Şuhûdü’l-hâl: Fahrü’l-kuzât Sadeddin Efendi b. Salih, Abdulkādir Efendi b. Mehmed, Ali Efendi b. Mustafa el-Kādı, Mehmed Emin Efendi b. Yusuf, Mustafa Efendi b. Mehmed Efendi, Mustafa Çelebi b. Mehmed, Süleyman Çelebi b. Hasan, İslam Beşe b. Bayram, Mustafa b. Şa‘ban ve gayruhum mine’l-huzzâr.