Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 515 Hüküm no: 583 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Salıcı Kostantin v. Avramiki’nin vârislerinden kız kardeşi Dökine’nin tereke hissesini emanet verdiği Praşkova v. Avyori’den parayı geri aldığı Mahrûse-i Selanik’de İkişerefeli Mahallesi’nden olup mahmiye-i İstanbul’da Bahçekapısı kurbünde Meydancık nâm mahalde sâkin iken bundan akdem hâlik olan Derzi Salıcı Kostantin v. Avramiki v. İstemat nâm zimmînin li-ebeveyn kız karındaşı ve hasran vârisi olan Dökine nâm Nasrâniye ba‘de’t-ta‘rîfi’ş-şer‘î meclis-i şer‘-i şerîf-i enverde işbu râfi‘u’s-sifr Praşkova v. Avyori nâm zimmî muvâcehesinde ikrâr ve takrîr-i kelâm edip mezbûr Praşkova’ya karındaşım hâlik-i mezbûrdan bana isâbet eden beş yüz guruşumu bundan akdem bi-tarîkı’l-emâne def‘ ü teslîm eylediğimde ber-vech-i muharrer mezbûr Praşkova dahi ahz u kabz etmişidi hâlâ meblağ-ı mezbûru mezbûr Praşkova yine bana def‘ ü teslîm edip ben dahi yedinden tamamen ahz u kabz eyledim meblağ-ı mezbûr beş yüz guruşdan mezkûr Praşkova yedinde ve kıbelinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 11 min-Şa‘bâni’l-mu‘azzam sene 1121 Şuhûdü’l-hâl: İbrahim Ağa b. ( ) el-Mübâşir, Salih b. Abdullah, Yusuf b. Hasan el-Mübâşir, Hasan Beşe b. Mustafa, Ali b. İvaz ve gayruhum mine’l-huzzâr. Nikola v. Dimo, Dimitri v. Yani, Todori v. İstano, Petro v. Rado, Sefer v. Kirkor, Manol v. Zafiri, Yorgi v. Todori.