Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 516 Hüküm no: 584 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Mustafa Çelebi b. Abdullah’ın yanında çalışan Seyyid İbrahim Çelebi b. Seyyid İsmail’de olan alacağının ödenmesine yapılan tenbih Mahmiye-i İstanbul’da Ayakapısı’nda [Ayakapısı] kurbünde sâkin kasab tâifesinden işbu râfi‘u’l-kitâb Mustafa Çelebi b. Abdurrahman nâm kimesne meclis-i şer‘-i şerîf-i enverde kanâdârı es-Seyyid İbrahim Çelebi b. es-Seyyid İsmail nâm kimesne mahzarında üzerine da‘vâ ve takrîr-i kelâm edip mezbûr es-Seyyid İbrahim Çelebi kanâdârım olmağla âhara bey‘ ve kendi mesârifine sarfla istihlâk eylediği vezni beynimizde ma‘lûm lahm-ı ganem bahâsından yedimde olan temessük nâtık olduğu üzere on dokuz bin sekiz yüz elli iki akçe ve bin yüz yirmi Şa‘bâni’l-mu‘azzamının on yedinci gününden yirmi bir Cemâziyelâhir’inin on dokuzuncu gününe gelince yine âhara bey‘ ve istihlâk eylediği vezni beynimizde ma‘lûm lahm-ı ganem bahâsından ba‘de küll-i hesâb altı bin akçe ve yine sene-i mezbûre Cumâdelâhire’sinin on dokuzuncu gününden târih-i kitâba gelinceye değin âhara bey‘ ve istihlâk eylediği vezni beynimizde ma‘lûm lahm-ı ganem bahâsından ba‘de küll-i hesâb beş bin dört yüz kırk bir akçe ki cem‘an otuz bir bin iki yüz doksan üç akçe hakkım olup taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr es-Seyyid İbrahim Çelebi cevâbında fi’l-vâki‘ kaziyye minvâl-i muharrer üzere olup cihât-ı mezkûreden zimmetimde ber-vech-i muharrer cem‘an otuz bir bin iki yüz doksan üç akçe deynim vardır deyü tâyi‘an ikrâr u i‘tirâf etmeğin alâ-mûcebi i‘tirâfihî meblağ-ı mezbûr otuz bir bin iki yüz doksan üç akçeyi müdde‘î-i mezbûr Mustafa Çelebi’ye edâ ve teslîme mezkûr es-Seyyid İbrahim Çelebi’ye tenbîh olunup mâ-vaka‘a bi’t-taleb ketb olundu. Fî 12 min-Şa‘bâni’l-mu‘azzam sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Çalık Mehmed b. Abdullah, Süleyman b. Abdullah, Hasan b. Mustafa ve gayruhum mine’l-huzzâr.